Xunta de Galicia
Vostede está aquí:

Actualidade Comercial

  • 23 Agosto, 2011
    A Consellería de Economía e Industria ten previsto publicar na vindeira semana, no Diario Oficial de Galicia, a orde pola que se regula a obtención de axudas para promover a sociedade da información no comercio retallista galego para o ano 2011.

    A orde supón o desenvolvemento e cumprimento do disposto no Plan Ágora Agora Re-Comercia no seu programa II.

    Como gran novidade desta convocatoria 2011, os comerciantes poderán acceder a estas axudas adquirindo o equipamento subvencionado directamente nas entidades colaboradoras que resulten seleccionadas na primeira fase de xestión desta orde de axudas.

    O material subvencionado por esta orde de axudas inclúe equipamento informático, páxinas web, aplicacións informáticas comerciais, compoñentes menores e TPVS para o exercicio da actividade comercial retallista.

  • 19 Agosto, 2011
    Hoxe, Mª Nava Castro Domínguez, Directora Xeral de Comercio, asistirá á inauguración da Feira de oportunidades de Cambados

    Un total de 24 comercios exporán os seus produtos durante a Feira de oportunidades de Cambados, que se celebra este fin de semana no Paseo da Calzada.  A intención da asociación de comerciantes é celebrar a feira cada dous anos, de modo que non procedería facela ata 2012, pero moitos negocios solicitaron que se organiza tamén este verán debido á forte crise que está atravesando o sector.

    A feira empezará este venres 19 e terminará o vindeiro domingo 21. Durante tres días, os 24 comercios van ocupar 37 casetas, cunha superficie de 500 metros cadrados. Poderanse obter produtos con descontos dende o 50% ata o 80%. Nesta feira poderase comprar calquera tipo de produtos, dende moda, deportes, complementos ata fogar ou decoranción incluso pasando por produtos tradicionais galegos ou electrodomésticos.  Tamén hai que deixar patente a presenza da Asociación Protectora de Animais de Cambados.

    Este evento será inaugurado hoxe pola directora xeral de comercio, Nava Castro Domínguez.

    A feira contará cun horario ininterrompido de 10 a 22h.

  • 18 Agosto, 2011
    O 7º Encontro nacional de mercados municipais retallistas: novos barrios, novos mercados

    Mercasa e a Federación Española de Municipios e Provincias (FEMP) puxeron en marcha a convocatoria do 7º Encontro Nacional de Mercados Municipais Minoristas, que se celebrará en Zaragoza, os próximos 21 e 22 de novembro, e reunirá máis de 600 responsables municipais e doutras administracións, xunto a comerciantes dos Mercados e expertos de todos os ámbitos sobre comercio e consumo.

    Mercasa e a FEMP veñen organizando estes Encontros con carácter bienal dende 1998, sempre cun resultado moi positivo, tanto de asistencia coma polos debates e conclusións alcanzadas, que contribuíron a reforzar a posición de liderado dos Mercados Municipais na distribución alimentaria española.

    O 7º Encontro Nacional de Mercados Municipais Minoristas convócase baixo o lema "Novos barrios, novos mercados," porque nesta ocasión os relatorios e intervencións previstas, como sempre cos mellores expertos e profesionais relacionados cos Mercados Municipais Minoristas, queren contribuír de xeito especial ao debate sobre a oportunidade estratéxica de apostar polos Mercados Municipais nos novos desenvolvementos urbanos das cidades.

    O obxectivo é dar resposta a unha demanda crecente dos consumidores por unha oferta comercial de proximidade, coa máxima calidade nos servizos e os produtos, complementaria co resto de formatos comerciais. Unha demanda que nos novos barrios se dirixe expresamente aos Mercados Municipais Minoristas.

    A organización do 7º Encontro Nacional de Mercados Municipais Minoristas conta co apoio do Goberno de Aragón, o Concello de Zaragoza, Mercazaragoza, o Ministerio de Industria, Turismo e Comercio; e o Ministerio de Medio e Medio Rural e Mariño.

     

     

    Descargar programa de relatorio

    Máis información
  • 18 Agosto, 2011
    A creación de empresas aumenta en Galicia un 15%, o dobre que a media

    A comunidade é a segunda que máis sociedades constitúe en xuño

    REDACCIÓN - VIGO Galicia crea empresas a bo ritmo no medio da tormenta financeira internacional. A comunidade autónoma pechou o pasado mes de xuño con 391 novas sociedades mercantís, unha cifra que supera nun 14,7% o dato rexistrado no mesmo mes de 2010, o dobre que a media estatal (dun 6,8%) e sitúa a Galicia como a segunda comunidade cun maior incremento porcentual. Iso polo menos asegurou onte a Consellería de Economía e Industria, que se felicitou do avance estatístico do parque empresarial galego. O PSdeG lamentou non obstante a desaparición do conselleiro Javier Guerra en pleno mes de agosto e a pesar da "destrución do tecido industrial" que na súa opinión se produce na comunidade.
    A Coruña e Pontevedra son as cabezas que demostran un maior dinamismo, empatadas con 149 novas empresas, seguidas de Lugo (47) e Ourense (46). Como acontece no resto do Estado, a maioría dos emprendedores de xuño crearon sociedades limitadas -389 fronte a dúas sociedades anónimas-.
    As 391 novas empresas constituídas en Galicia durante o pasado mes de xuño sumaron un capital subscrito de 74 millóns de euros, aínda que só a metade, 35,2 euros foron desembolsados no momento da creación das empresas, segundo a estatística feita pública onte polo Instituto Nacional de Estatística (INE). Este fenómeno prodúcese sobre todo polas novas sociedades anónimas creadas en Ourense, que só desembolsaron 12,8 millóns dos 51,4 subscritos, e Pontevedra (100 de 300).

    Fonte: Faro de Vigo

  • 17 Agosto, 2011
    O tirón das exportacións dispara o superávit comercial de Galicia un 160%

    A comunidade logra este ano un saldo positivo de 1.727 millones, o maior de España

    JOSÉCARNEIRO VIGO. O tirón das exportacións disparou o superávit comercial de Galicia un 160% no que vai de ano. As empresas da comunidade aumentaron as súas vendas ao estranxeiro un 23,7% nos cinco primeiros meses de 2011, mentres que as importacións subiron só un 7%, o que bota un saldo comercial positivo de 1.727 millóns de euros, o maior de todo o Estado, seguido polo navarro (1.124). Detrás do bo comportamento das exportacións están as entregas protagonizadas polos estaleiros galegos nos cinco primeiros meses do ano e os sectores da enerxía e o téxtil, este último lanzado por Inditex.

     As exportacións alcanzaron os 7.539 millóns de euros entre xaneiro e maio, un 23,7% máis que no mesmo período de 2010, mentres que as importacións chegaron a 5.811 millóns (+7%). Pontevedra mantén o seu liderado exportador, con máis da metade das vendas efectuadas ao estranxeiro (un 53% do total, con 4.047 millóns de euros), pero foi en cambio a provincia onde menos creceron nestes cinco primeiros meses, un 13,6%. A maior suba rexistrouse en Lugo (+44%), onde se exportaron mercadorías valoradas en 237 millóns, seguida pola Coruña (+39%), con 2.989 millóns, e Ourense, con 264 (+23%).

     Por sectores económicos, o que máis creceu foi o de bens de equipo (+54,4%), cun volume de 1.599 millóns de euros nos cinco primeiros meses do ano, debido sobre todo ás distintas entregas de buques protagonizadas polos estaleiros galegos. Tamén destacan as subas rexistradas pola enerxía, do 29,65%, ata os 379 millóns de euros; e as manufacturas de consumo, sobre todo o téxtil, cun incremento do 20,81% e un volume de 1.347 millóns. O motor económico da comunidade, a industria do automóbil, pechou maio cunha suba das exportacións do 9,78% e un volume total de 1.848 millóns, case o 20% do total exportado por Galicia.
     

    O último estudo sobre as empresas exportadoras en España, elaborado polas Cámaras de Comercio, revela que o número de firmas que exportan de forma habitual en Galicia creceu un 5,8% en apenas cinco anos, o que axuda a consolidar a internacionalización da economía galega. Así, ao peche de 2009 había nesta comunidade 2.056 empresas exportadoras (case de 60% da provincia de Pontevedra), 114 máis que en 2005.
    O estudo fai fincapé, non obstante, na excesiva concentración das exportacións nun reducido número de empresas. Tanto é así que apenas media ducia de compañías acaparan a metade do comercio exterior galego, como son a planta viguesa de PSA Peugeot Citroën, o Grupo Inditex, Repsol, Finsa e Pescanova, entre outras.
     

    España
    A nivel nacional, as exportacións non estacionais ao exterior creceron un 19% entre xaneiro e maio deste ano, ata os 87.500 millóns de euros fronte aos 73.400 millóns no mesmo período do ano anterior, segundo datos preliminares publicados onte martes pola oficina estatística europea, Eurostat.

    Fonte: Faro de Vigo

    Máis información
  • 11 Agosto, 2011
    Economía e Industria inviste 8,3 millóns de euros, un 12% máis que o ano pasado, na mellora das zonas comerciais dos concellos para favorecer o dinamismo e a xeración de emprego
    • O Goberno Galego axuda aos concellos nun momento complexo realizando un importante esforzo e incrementando a partida adicada a estas subvencións en preto de 1 millón de euros
    • A Xunta renova o seu compromiso cos concellos e fomenta o desenvolvemento de mercados e zonas comerciais racionais, accesibles e modernas
    • A prioridade da Consellería de Economía e Industria, dentro do seu Plan Ágora- Agora re-Comercia, é a potenciación do comercio de proximidade, o incremento da súa calidade e a creación de emprego
    • Os centros comerciais abertos, os eixes comerciais, as prazas de abastos e os mercados tradicionais, cobran un especial protagonismo nestas actuacións
    • Para facer mais doados os trámites e a execución das obras, Economía e Industria contempla anticipos de ata o 50% das subvencións

    Santiago, 11 agosto de 2011.- A Consellería de Economía e Industria renova o seu compromiso cos concellos para a adecuación e modernización dos equipamentos comerciais municipais, dentro das accións contempladas no Plan Ágora- Agora reComercia. cun investimento de 8,3 millóns de euros para os anos 2011-2012, preto de 1 millón de euros máis que o pasado exercicio (o que supón un incremento do 12%). A Xunta de Galicia fai un importante esforzo para priorizar e axudar aos municipios, nun momento complexo para as administracións locais, co obxectivo de impulsar a mellora das zonas comerciais favorecendo o crecemento e a xeración de emprego nas comarcas galegas.

    O Conselleiro de Economía e Industria sinalou a importancia do comercio para e desenvolvemento económico e social galego e salientou que “é un momento importante para apostar polo noso comercio, un comercio que significa máis do 10% do PIB galego”. Neste eido, a Consellería continua a traballar nas súa política de apoio ao comercio de proximidade xa que mediante as obras de mellora das zonas comerciais se potencia, sobre todo,ao pequeno e mediano comercio con fin de reforzar o seu potencial dinamizador e a súa competitividade. É importante salientar que na actual situación de crise, apuntou o conselleiro “é fundamental establecer unha liña de colaboración cos concellos para posibilitar a axuda ao comercio de forma directa”.

    Con estas subvencións aos concellos a Xunta está impulsando a mellora das zonas que, tradicionalmente, concentran a actividade comercial das nosas vilas e cidades. Os centros comerciais abertos, os eixes comerciais, as prazas de abastos e os mercados tradicionais, cobran un especial protagonismo nestas actuacións.

    Concretamente, a orde concede axudas para a adecuación e mellora de 20 mercados de abastos; 5 mercados ambulantes; a reforma, equipamento e mobiliario urbano en 74 prazas e rúas comerciais; a modernización e mellora de 10 eixes comerciais e a creación de catro novos puntos Redic en Concellos. Todas estas accións buscarán o desenvolvemento de mercados e zonas comerciais racionais, accesibles e modernas, engadindo calidade ao comercio galego.


    Axilidade dos trámites
    Ademais, para mellorar o financiamento das obras programadas nos concellos e axudar a paliar os efectos dunha época na que as administracións están a ver minorados sus ingresos, sobre todo, a administración local, a Xunta quere facer un esforzo para contribuír ao seu achegamento ao cidadán e ao comerciante. Por todo iso, entre as medidas tomadas para facer máis doados os trámites e a execución das obras se contemplan anticipos de ata o 50% das subvencións

    Un dos obxectivos da Xunta de Galicia coa posta en marcha de estas actuacións, xunto coa Lei do Comercio Interior de Galicia e o Plan Ágora, é fomentar e protexer ao pequeno e mediano comercio fronte as grandes superficies.

  • 10 Agosto, 2011
    Economía e Industria impulsa un proxecto para fusionar artesanía tradicional e deseño co fin de abrir novos mercados aos artesáns galegos
    • A directora xeral de Comercio, Nava Castro, xunto a Elena Fabeiro, xerente da Fundación Centro Galego de Artesanía e do Deseño; o alcalde de Vila de Cruces, Jesús Otero e representantes do concello de Sanxenxo, presentaron hoxe os primeiros produtos en Sanxenxo
    • A iniciativa, baixo o nome "D-due LAB" e feita en colaboración coa firma galega D-Due, permitirá facer unha nova interpretación do produto artesán tradicional, acorde coas tendencias actuais do mercado da moda e da decoración e contribuirá a impulsar a súa comercialización en novos mercados
    • Na colección de produtos que se desenvolverá poderán participar os artesáns inscritos no Rexistro Xeral de Artesanía de Galicia
    • O proxecto enmarcase na política da Conselleria de Economía e Industria de apoio á dinamización do pequeno comercio dentro do Plan Agora

     

    Preme a fotografía para ver a mostra

     Santiago de Compostela, 12 de agosto de 2011.-  Presentación aos medios na tenda da firma textil galega D-due do Porto Deportivo Juan Carlos I de Sanxenxo dun proxecto experimental de incorporación do produto artesán feito en Galicia aos deseños da súa nova colección. A Fundación Centro Galego da Artesanía e do Deseño, dependente da Consellería de Economía e Industria, colabora coa empresa neste novo proxecto que aposta pola interconexión entre deseño e artesanía, a través dun apoio económico de 10.000 euros.

     Esta iniciativa, denominada D-due LAB, ten como obxectivo a creación da colección de verán 2012 da marca D-due na que se incorporarán pezas que se lle encargarán a artesáns inscritos no Rexistro Xeral de Artesanía de Galicia. Trátase dun proxecto que se irá conformando e medrando co paso dos meses e do que se presentoun  nunha primeira mostra na Feria Bread&Butter de Berlín no mes de xullo.

     Empresas artesáns como Elena Ferro ( Merza, Vila de Cruces) e Idoia Cuesta (Outeiro de Rei), recentes finalistas dos Premios Nacionales de Artesanía 2011 participan neste proxecto. Nesta primeira fase do proxecto participan obradoiros especializados no téxtil, na olería tradicional, na xoiería, na elaboración de zocos ou nos complementos.

     Asemade, D-due ten previsto incorporar pezas de artesanía tanto na decoración das súas tendas como para a súa venda directa a través dos tres establecementos comerciais dos que dispón en España, entre os que destaca o recentemente inaugurado en Mallorca.

     Na actualidade, as prendas das coleccións de D-due pódense atopar tamén nos principais puntos de venda do mercado da moda tanto en Europa, en países coma o Reino Unido, Italia, Francia ou Suíza, coma nos Estados Unidos, a través do seu punto de venda en Nova Iorque, ou noutros países menos accesibles para os artesáns galegos como poden ser Xapón, China, Qatar, Kuwait, Indonesia ou Corea.

     Dende a Consellería de Economía e Industria estanse a impulsar diferentes iniciativas encamiñadas a introdución do produto artesán galego en diferentes mercados, a través da presenza da marca Artesanía de Galicia en feiras profesionais internacionais de carácter internacional ou de iniciativas máis concretas como a promoción do produto artesán galego no eido do agasallo internacional.

     Neste caso, a Consellería entende que o proxecto D-due LAB contribuirá a situar a artesanía en canles e mercados diferentes dos habituais, permitirá facer unha nova interpretación do produto artesán tradicional dende unha perspectiva relacionada co deseño de moda e da decoración de interiores, acorde coas tendencias actuais do mercado, o que lle abrirá sen dúbida novas vías de comercialización no futuro. 

  • 08 Agosto, 2011
    ECONOMÍA E INDUSTRIA PON EN MARCHA A CAMPAÑA DE VERÁN PARA O CONTROL DOS XOGUETES INFANTÍS
    • A directora xeral de Comercio, Nava Castro Domínguez, e a xerente do Instituto Galego de Consumo, Mª Jesús Muñoz Chesa, salientan o traballo do Laboratorio de Consumo de Galicia, o único oficial de toda España acreditado para analizar a seguridade dos xoguetes segundo a norma europea UNE-EN 71-1
    • O Instituto Galego de Consumo recorda que é fundamental comprobar a etiquetaxe e as medidas de seguridade antes de mercar cada produto
    • Entre os riscos máis comúns atópanse as bolsas ou embalaxes de xoguetes, os materiais expandibles, os bordos cortantes ou as máscaras e cascos, os proxectís que lanzan algúns xoguetes, a inflamabilidade dos materiais dos xoguetes, a presenza de certos compostos químicos, os imáns, os adhesivos, os cordóns, os choques eléctricos ou os flotadores de asento
    • O Instituto Galego de Consumo recorda tamén os coidados que deben terse coas compras de gafas de sol e as cremas de protección solar

     

    Santiago, 8 de agosto de 2011.- A Consellería de Economía e Industria recoméndalle aos pais que incrementen a precaución á hora de elixir os xoguetes infantís que empregan os seus fillos e fillas durante o verán, de xeito que se aseguren de que os xoguetes que mercan estean especificamente recomendados para os cativos. Así o explicaron hoxe a directora xeral de Comercio, Nava Castro Domínguez, e a xerente do Instituto Galego de Consumo, Mª Jesús Muñoz Chesa, na presentación da campaña de verán de control de xoguetes infantís, posta en marcha dende a Consellería.

    A directora xeral de Comercio incidiu na necesidade de seleccionar con moita atención un xoguete ou un xogo, en función da idade e do desenvolvemento mental ou físico do neno ou da nena que o vai empregar, posto que moitos dos accidentes se producen cando os nenos manipulan xoguetes que non están deseñados especificamente para eles.

    Nava Castro lembrou que a Consellería de Economía e Industria dispón do único laboratorio de toda España acreditado para analizar a seguridade dos xoguetes segundo a norma europea UNE-EN 71-1, unha norma que pretende reducir ao máximo posible os riscos que non son evidentes para os usuarios. O Laboratorio de Consumo de Galicia está conformado por cinco departamentos nos que se analizan produtos de consumo mecánico, téxtil, eléctrico, químico e electrónico, e cada ano analiza unha media de 125 xoguetes para comprobar a súa adecuación coas normas de seguridade.

    No ano 2010, o Laboratorio de Consumo de Galicia localizou o 25% de todos os xoguetes que se detectaron perigosos en España e, neste ano 2011, leva analizados xa máis de 70 xoguetes, nos que detectaron 22 cumprimentos graves de seguridade. Entre os riscos máis comúns relacionados con estes xoguetes atópanse as bolsas ou embalaxes, os materiais expandibles, os bordos cortantes, as máscaras e cascos, os

    proxectís que lanzan algúns xoguetes, a inflamabilidade dos materiais dosxoguetes, a presenza de certos compostos químicos, os imáns, os adhesivos, os cordóns, os choques eléctricos ou os flotadores de asento, ademais de riscos específicos para nenos menores de 3 anos, para os que se recomenda extremar as precaucións.

    Entre as medidas que se lles recomendan aos pais atópanse revisar a etiquetaxe do xoguete para comprobar que figuran os datos do responsable do produto e que dispón do marcado CE, ler as instrucións de manexo e advertencias – que deberán estar en idioma oficial – comprobar que non teñan bordos cortantes e, no caso dos xoguetes eléctricos, que non teñan fontes de alimentacións a máis de 24 voltios.

    Outros produtos

    En canto ás gafas de sol, Nava Castro sinalou que estas deben dispoñer dun marcado sobre a montura, a embalaxe ou en forma de etiqueta adhesiva que inclúa os datos do fabricante, o número de categoría do filtro, o número e ano da norma europea que acredita cumprir, así como que inclúan o marcado CE.

    Outra das recomendacións útiles para a temporada de verán é a toma de precaucións con respecto ás cremas de protección solar, que deben indicar o factor de protección solar que proporcionan, evitando reclamos do tipo “pantalla total” que poden confundir os consumidores. Así mesmo, deberán informar de cuestións coma o período máximo de permanencia en condicións de insolacións ou a resistencia á auga do protector solar.

  • 05 Agosto, 2011
    O Capítulo Serenísimo do viño Albariño, concédelles ao conselleiro de Economía e Industria e á directora xeral de Comercio, o Título de Cabaleiro e Folla de Prata

    Lugar: Cambados

    Data: 07/08/2011

    Hora: 13 h

     

    Na LIX Festa do Albariño, o Capítulo Serenísimo do viño Albariño, acourdou entre outras personalidades, concederlle a distinción de Cabaleiro Serenísimo do Albariño, ao conselleiro de Economía e Indsutria, Javier Guerra e, de Folla de Prata á directora xeral de Comercio, Nava Castro.

  • 02 Agosto, 2011
    Economía e Industria mellora as zonas comerciais de Baiona para favorecer o crecemento e a xeración de emprego no pequeno comercio
    • Javier Guerra inaugurou hoxe as reformas da rúa de Baiona e lembrou que a Consellería ten investido preto de 4,7 millóns de euros na dinamización empresarial e comercial do concello, así como na mellora dos seus servizos e mais na creación de emprego
    • O Plan Ágora- Agora re-Comercia da Consellería apoia o desenvolvemento de mercados e zonas comerciais racionais, accesibles e modernas
    • A prioridade da Consellería de Economía e Industria no ámbito comercial é a do comercio de proximidade e a creación de emprego.

    Santiago, 2 agosto de 2011.- A Consellería de Economía e Industria ven de mellorar as zonas comercias do concello de Baiona mediante a recuperación da rúa Carabela la Pinta e a futura rehabilitación da fachada da Praza de Abastos. Neste sentido, a Consellería continúa traballando nas súas política de apoio ao comercio de proximidade xa que mediante as obras de melloras das zonas comerciais se potencia, sobre todo, ao pequeno e mediano comercio.

    Javier Guerra inaugurou hoxe as reformas da rúa de Baiona e lembrou que a Consellería ten investido preto de 4,7 millóns de euros na dinamización empresarial e comercial do concello, así como na mellora dos seus servizos e mais na creación de emprego.

    Guerra lembrou que en Baiona, o 97,37% das empresas son microempresas e máis do 50% trátase de autónomos. Ademais, debese ter en conta que a actividade comercial ten un peso no 30% no sector servizos. Estas cifras evidencian que apoiar o comercio de proximidade é apoiar a creación de emprego e, sobre todo, a xeración de autoemprego.

    Neste sentido, a Xunta está impulsando a mellora das zonas que, tradicionalmente, concentran a actividade comercial das nosas vilas e cidades, xa que isto significa engadir calidade ao comercio galego. Con estas accións e, sobre todo coa Lei do Comercio Interior de Galicia e o Plan Ágora, a Xunta o que quere é fomentar e protexer ao pequeno e mediano comercio fronte as grandes superficies. Non esquezamos que o comercio de proximidade é clave para o crecemento económico e social dos concellos, neste caso do de Baiona.

    A recuperación da Rúa Carabela la Pinta
    Coa recuperación da rúa Carabela la Pinta, no marco do Centro Comercial Aberto Baiona Real, mellorase unha zona prioritaria para a implantación de diferentes actividades mercantís e comerciais, tanto do sector da hostalaría como do comercio de proximidade no concello de Baiona.

    A humanización desta rúa foi, sen dúbida, necesaria, xa que tras a súa degradación paulatina desde os anos 70 non houbo unha recuperación total da mesma. Neste sentido, a Conselleria traballou por recuperar o patrimonio histórico-paisaxístico. Diversas foron as accións levadas a cabo neste sentido: recuperación da Alameda e a fonte-labadoiro, a mellora do tráfico rodado e unha mellora substancial dos espazos de circulación peonís, melloras no sistema de contenerización dos vertidos sólidos e tamén melloras da rede eléctrica de instalacións urbanas de alumeado público, saneamento, abastecemento de auga, rego, gas e telecomunicacións.

    Esta rúa sempre tivo un marcado carácter comercial con distintas actividades comerciais e mercantís (café, restaurantes), comercio ao por menor (farmacia, téxtiles, etc), oficinas bancarias, destacando a presenza do Mercado Municipal de Abastos. Polo que foron un total de 36 establecementos mercantís os beneficiados da recuperación da devandita rúa.

  • 30 Xullo, 2011
    Economía e industria inviste 30.000 euros na organización da feira de artesanía mostrart.


    - A directora xeral de Comercio, Nava Castro Domínguez, o alcalde de A Coruña, Carlos Negreira e a xerente da Fundación Centro Galego da Artesanía e do Deseño, Elena Fabeiro Castro, participaron no acto de inauguración deste evento que estará aberto entre o 30 de xullo e o 15 de agosto nos Xardíns Méndez Núñez da Coruña.
     

    - Nava Castro destacou a importancia de Mostrart como un evento de referencia en Galicia tanto polo número de expositores, que este ano rondan os 60, como pola afluencia de visitantes.

     

    A Coruña, 30 de xullo de 2011.- A Consellería de Economía e Industria apoia con 30.000 euros a celebración da feira de artesanía Mostrart, que se celebra na Coruña entre o 30 de xullo e o 15 de agosto. A directora xeral de Comercio, Nava Castro Domínguez, o Alcalde de A Coruña, Carlos Negreira e  mais a xerente da Fundación Centro Galego da Artesanía e do Deseño, Elena Fabeiro Castro, participaron esta mañá no acto de inauguración da feira, na que participan 58 expositores.

    Nava Castro sinalou a importancia de Mostrart como unha das feiras de venda directa de maior relevancia en Galicia, tanto polo número de expositores con carta de artesán, como pola afluencia de visitantes. Durante o acto, fixo fincapé no papel deste tipo de eventos que contribúen a dinamizar a comercialización da artesanía galega, incrementan a atracción turística e, polo tanto, a actividade económica da zona.

    Mostrart permítelle aos visitantes entrar en contacto directo cos propios artesáns, que están especializados nunha grande variedade de oficios diversos: téxtil, coiro, xoiaría, bixutería, complementos, encaixes, serigrafía, vidro, cerámica, xoguetes, cartón pedra, madeira, olería, etc. Os expositores galegos que participan nesta edición de Mostrart son: A Feitura (A Coruña), A Xente das Cores (Mondoñedo), A. Outeiriño Tecido Artesán (Ourense), Ardentía Deseño en Prata (Bergondo), AreladeFe (A Guarda), Artefíos - Asoc. Padres Formación Jóvenes Límite (A Coruña), Artesanía en Plata (Marín), Belén Soto (Pontevedra), Bruxarte (Vigo), C. Canoura Deseño (Culleredo), C.G. Cristal Reciclado (Vigo), Cabuxa (Tui), Cerámica e Prata – F. Porto (A Estrada), Cerámica SUVE (Cangas do Morrazo), Charamusca (Carnota), Chueco (A Coruña), Cuaderna Maestra (Ponte Caldelas), E. Ferro (Merza), Elena Arce (A Coruña), En Lá (Monforte de Lemos), Encaixes Melania Camariñas (Camariñas), Encaixes Mónica Pose(Camariñas), Encoiros (Vigo), Estiva da Vella (Ferrol), F. Mourón – Buño (Malpica de Bergantiños), Fer (Santiago de Compostela), Ferreira Cerámica (Vigo), Fiada Tecido Manual (Carral), Flecharte (Vigo), Gelina Camariñas (Camariñas), Jatafarta (Berres), Joyas de Papel (Nigrán), La Böcöque (Moaña), Laia Zapateiros (Melide), María Feijóo (Santiago), Maysil (A Estrada), Nordes (Carnota), Pablo Leal (Teo), Plata Nativa (A Coruña), Regal Cerámica Artesán (Viveiro), Rosa Higuero (Cabanas), Rosa Méndez (Teo), Sánchez-Cano Orfebres (Vigo), Santín (Cambre), Silvereira (Teo), Suso Calo (Moaña), Taller Amona (Cabanas), Taller Sur (Marín), Taller Viola – Flor Seca (Oza dos Ríos), Tallería Cristal (A Coruña), Tragamasa Bichería Fina (Oleiros), V/M Artesanía (A Coruña), Varo Caride (Vigo), Vidal Revilla (Cervo) e Zimzelatum (Gondomar).

    A Xunta de Galicia  contará por primeira vez con un stand institucional da Fundación Centro Galego da Artesanía e do deseño dentro da mostra para a promoción da marca Artesanía de Galicia propiedade da Xunta de Galicia. Entre os obxectivos da Fundación está o de impulsar a exhibición do produto artesán galego entre a sociedade. Por este motivo, apoia a celebración de feiras de venda directa e diferentes eventos de promoción da artesanía, realizadas por iniciativa de concellos e de asociacións profesionais de artesáns, como é o caso da Asociación Galega de Artesáns (AGA), que cada ano se encarga de organizar a feira Mostrart. 

  • 27 Xullo, 2011
    Economía e industria continúa na súa estratexia de apoio ao pequeno e mediano comercio.

    - A directora Xeral de Comercio, Nava Castro, participou hoxe na presentación da nova imaxe da Praza de Abastos de Padrón

    - A Consellería de Economía e Industria ten deseñado unha estratexia de apoio ao pequeno comercio, que converteu a dinamización do comercio de proximidade nunha prioridade da estratexia de dinamización da comercial da Xunta, recollida no Plan Ágora- Agora Recomercia

    - Nava Castro recordou que neste exercicio a Consellería de Economía e Industria adxudicou unha partida global de presto de 3 millóns de euros, destinada á dinamización das Prazas de Abastos e Centros Comerciais Abertos

    Padrón, 27 de xullo de 2011.- A directora Xeral de Comercio, Nava Castro, participou hoxe na presentación da nova imaxe da Praza de Abastos de Padrón, e recordou que a Consellería de Economía e Industria ten deseñado unha estratexia de apoio ao pequeno comercio, que converteu a dinamización do comercio de proximidade nunha prioridade da estratexia de dinamización da comercial da Xunta, recollida no Plan Ágora- Agora Recomercia.

    Neste sentido, Nava Castro recordou que neste exercicio a Consellería de Economía e Industria adxudicou unha partida global de presto de 3 millóns de euros, destinada á dinamización das Prazas de Abastos e Centros Comerciais Abertos das catro provincias galegas, ao abeiro das axudas establecidas no programa de subvencións para mellorar a competitividade destas organizacións comerciais.

    A directora Xeral de Comercio  salientou a importancia da Praza de Abastos de Padrón, e sinalou que este tipo de mercados representa unha alternativa interesante ás grandes superficies porque apostan pola excelencia na prestación de servizos e fan rendible as súas maiores vantaxes competitivas: a proximidade, a calidade, a atención personalizada e a diversidade da súa oferta.

    Deste xeito, a Consellería de Economía e Industria está a impulsar a dinamización e rexeneración das prazas de abastos, a creación de sistemas de fidelización a través de servizos dirixidos aos clientes que supoñan unha vantaxe para estes, a mellora das instalacións e o equipamento dos mercados, así como a sinalización comercial.

  • 26 Xullo, 2011
    Charla sobre a Lei de Comercio de Galicia

    A directora xeral de Comercio Mª Nava Castro participará nunha charla sobre a Lei de Comercio de Galicia.
    Organizada por: Asociación Centro Comercial Local ESTRELA DE MARÍN
    Lugar de celebración: Museo Municipal Manuel Torres, Avda de Ourense, 1 – Marín
    Hora: 21,00 h.

  • 22 Xullo, 2011
    Economía e Industria impulsa o comercio de proximidade coa creación do “Portal do comerciante”
    Máis información
  • 18 Xullo, 2011
    A Xunta de Galicia garante o cumprimento da nova Lei de Comercio en materia de promocións e rebaixas.
    Máis información
  • 18 Xullo, 2011
    Nava Castro destaca a importancia dos emprendedores como “auténticos protagonistas da reactivación económica”.
    Máis información
  • 18 Xullo, 2011
    Feijóo destaca que a constitución de 116 mesas locais de comercio fomenta a participación do sector e promove medidas para a pervivencia do pequeno comercio nas vilas e cidades galegas.
    Máis información
  • 18 Xullo, 2011
    A Xunta activa un novo programa de apoio ao comercio de proximidade con actividades de información, formación e promoción dotado con 700.800 euros.
    Máis información
  • 18 Xullo, 2011
    A Xunta presenta un Decreto pioneiro para a implantación dos establecementos comerciais superiores a 2.500 metros “a prol dos intereses xerais e a racionalidade no desenvolvemento comercial”.
    Máis información
  • 18 Xullo, 2011
    Economía e Industria pon en marcha o Rexistro Galego de Comercio.
    Máis información

  • Páxina 78 de 78

  • Mostrando do 1541 ao 1560 dun total de 1560 rexistros