Actualidade Comercial
Actualidade Comercial
-
09 Xullo, 2015Feijóo presenta o programa Capacita, que destinará 4 millóns de euros á formación de 10.000 emprendedores durante os vindeiros 18 meses
Santiago, 9 de xullo de 2015.- O presidente da Xunta, Alberto Núñez Feijóo, presentou esta mañá o programa Capacita, que destinará 4 millóns de euros á formación de 10.000 emprendedores durante os vindeiros 18 meses. Trátase dunha iniciativa pioneira para mellorar a capacitación profesional dos traballadores e das pequenas e medianas empresas galegas.
O programa Capacita pretende chegar a máis de 4.000 pemes e un total de 10.000 persoas. Para acadar este obxectivo, recibirá unha dotación 4 millóns de euros a través do Igape, que se distribuirán ao longo de 2015 e 2016, a razón de 2 millóns de euros por ano. Estas achegas permitirán ofrecer unha ampla oferta de recursos de formación e especialización, cos que intensificar a produtividade empresarial na nosa Comunidade.
O presidente da Xunta lembrou que o plan se enmarca no contexto da Axenda da Competitividade Galicia – Industria 4.0, unha aposta do Goberno autonómico para acadar empresas altamente especializadas, na liña da estratexia europea de Especialización Intelixente RIS 3. Neste sentido, Alberto Núñez Feijóo destacou a importancia que lle outorga o programa Capacita ao aproveitamento das novas posibilidades industriais e ao desenvolvemento da fábrica intelixente.
Un amplo abano de accións formativas
Entre as accións formativas que contempla o programa tamén destacan as orientadas a facilitar a internacionalización das nosas empresas, como os cursos de idiomas, así como as novas posibilidades que ofrecen as tecnoloxías da información, a través do uso de recursos online.No tocante ao emprendemento, lembrou que se reforzará o apoio á Rede de Mentores, que permite o intercambio de coñecemento de empresarios e xestores experimentados con emprendedores e novos empresarios. Do mesmo xeito, poñeranse en marcha os Itinerarios Formativos do Emprendedor, que achegarán a información necesaria para acompañalo desde que ten unha idea de negocio ata que esta se concreta na creación dunha empresa.
Por último, tamén se impulsará a capacitación dos directivos e mandos intermedios, co obxectivo de aproveitar o seu talento e as súas habilidades na mellora competitiva das empresas. Para o presidente da Xunta, todas estas accións teñen un único obxectivo: “que as pemes frutifiquen e poidan consolidar emprego na Comunidade”, concluíu.
Máis información -
08 Xullo, 2015Conde salienta a cooperación como un elemento clave para avanzar na protección efectiva dos consumidores
Santiago, 8 de xullo de 2015.- O conselleiro de Economía e Industria, Francisco Conde, salientou esta mañá a coordinación e cooperación entre as administracións con competencias en materia de consumo así como coas distintas entidades implicadas como un elemento clave para avanzar na protección efectiva dos consumidores.
Conde, que participou no encontro do Consello de Dirección da Axencia Española de Consumo, Seguridade Alimentaria e Nutrición (Aecosan), dependente do Ministerio de Sanidade, que se reúne hoxe en Santiago, xunto cos consellos nacional e autonómico de consumidores e usuarios, resaltou o papel dos organismos que presiden Manuela López Besteiro e Rosa Otero, respectivamente, como órganos de consulta e representación institucional ante a Administración.
Destacou tamén o responsable de Economía e Industria na reunión, na que participou tamén a directora exectutiva de Aecosan, Teresa Robledo, o traballo das propias asociacións de consumidores, coas que o Instituto Galego de Consumo colabora cada ano para o desenvolvemento de actuacións de atención e resolución das reclamacións, e cuxo traballo, tal e como apuntou Conde, é imprescindible en ámbitos como a sensibilización, a información e o asesoramento.
Grazas a este traballo coordinado coas asociacións de consumidores e coa Administración central, nos seis primeiros meses do ano o Instituto Galego de Consumo leva atendidas máis de 14.000 consultas e tramitado preto de 8.500 reclamacións, acaparando unha vez máis as compañías de telefonía o maior número, cun 39%, seguidas polas eléctricas, cun 20% do total de reclamacións. Ademais, no primeiro semestre emitíronse preto de 1.600 laudos arbitrais, que en case o 80% dos casos foron favorables para o reclamante.
O IGC leva abertos máis de 1.000 expedientes sancionadores nos seis primeiros meses do ano, preto dun 10% máis que no mesmo período do ano anterior, por un importe total de 6,3 millóns, sendo a electricidade, con un 33% do número de expedientes, e a telefonía, cun 20%, os sectores máis sancionados.
No eido do control e seguridade do mercado, Galicia comunicou no que levamos de ano un total de 33 produtos inseguros á Rede de Alerta Nacional de produtos non alimenticios, grazas ao traballo da Inspección e do Laboratorio de Consumo de Galicia, o único dependente dunha autoridade de consumo que conta con acreditación ENAC.
Apuntou Conde que un dos ámbitos no que máis centra o IGC os seus esforzos é o da enerxía eléctrica, pola súa relevancia no benestar e na economía dos consumidores, Neste eido, nos seis primeiros meses do ano tramitáronse preto de 1.700 reclamacións, e un 77% xa teñen sido resoltas de forma favorable para o reclamante. Ademais, neste primeiro semestre o IGC ten aberto expedientes sancionadores ás eléctricas que suman 3,2 millóns de euros.
O conselleiro de Economía e Industria sinalou que as reunións que hoxe acolle Santiago, que se complementarán pola tarde cun encontro sobre a protección dos menores consumidores e as novas tecnoloxías, servirán para seguir avanzando na unidade de acción precisa para garantir un mercado máis seguro.
Máis información -
06 Xullo, 2015A feira Corazón da Artesanía de Agolada pecha a súa edición máis exitosa con 8.000 visitantes e un importante volume de vendas
Santiago, 6 de xullo de 2015.- Máis de 8.000 persoas visitaron desde o pasado venres e ata onte domingo en Agolada o Corazón da Artesanía. IV Encontro da Artesanía Tradicional e Popular de Galicia, que pechou a súa cuarta edición superando o número de visitantes de edicións anteriores, así como o volume de vendas tanto nos postos de venda de artesanía e demostración en vivo de oficios como nos dedicados aos produtos agroalimentarios de calidade. Consolídase así como referente anual do sector artesán galego o encontro que durante toda a fin de semana encheu de novo de vida o conxunto histórico-artístico dos Pendellos, cun programa no que artesanía, gastronomía e música foron da man.
Entre as actividades que espertaron especialmente o interese dos visitantes estiveron, ademais das diferentes actuacións musicais, como os concertos de Guadi Galego, Odaiko e a Magnifique Bande dos Homes sen Medo ou Brincadeira, as diferentes demostracións en vivo de oficios, como as de cerería, tornaría de madeira, follalataría, téxtil ou elaboración de moscas para a pesca.
Máis de 500 persoas participaron nas diferentes actividades para iniciarse na artesanía tanto para adultos como para nenos e nenas, coa posibilidade de probar a utilizar o torno de oleiro, aprender a facer cestos ou colaborar na elaboración dunha peza colectiva de patchwork, ademais dos obradoiros de origami ou reciclaxe para os máis pequenos. O Encontro, pensado tanto para o público xeral como para os profesionais e especialistas, reuniu a máis de 50 profesionais de diferentes disciplinas nos workshops cursos especializados.
Ademais, o Corazón da Artesanía permitiu tamén abrir novas vías de colaboración e oportunidades de negocio para os artesáns e emprendedores participantes. Neste sentido, cabe destacar que a empresa HP France, cuxo xefe de vendas visitou a feira xunto con dúas xornalistas da compañía, distribuirá pezas de Artesanía de Galicia nas súas tendas en Xapón, Estados Unidos e Francia.
Por outra banda, a iniciativa Artesanía no Prato, que cubriu unha vez máis todas as prazas dispoñibles, achegou a artesanía ás propostas da nova cociña galega, con showcookings a cargo de cociñeiros do Grupo Nove presentados en pezas de Artesanía de Galicia nos que se empregaron produtos de gastronomía á venda no propio Encontro.
A posta en marcha do IV Encontro da Artesanía Tradicional e Popular de Galicia, Corazón da Artesanía, forma parte do Plan de Artesanía de Galicia, que persegue conseguir un sector artesán sólido e sostible no tempo, incidindo na competitividade empresarial e a potenciación do talento galego.
Máis información -
05 Xullo, 2015Showcooking “Artesanía no prato”, a cargo do cociñeiro Javier Rodríguez Ponte-Taky, celebrado no marco do "Corazón da Artesanía. IV Encontro da Artesanía Tradicional e Popular de Galicia"
A directora de Turismo de Galicia, Nava Castro, a directora xeral de Comercio, Sol Vázquez, e a xerente da Fundación Centro Galego da Artesanía e do Deseño, Elena Fabeiro, participaron hoxe, no showcooking “Artesanía no prato”, a cargo do cociñeiro Javier Rodríguez Ponte-Taky, celebrado no marco do "Corazón da Artesanía. IV Encontro da Artesanía Tradicional e Popular de Galicia", nos pendellos de Agolada.
Máis información -
04 Xullo, 2015Conde destaca que a IX edición da Feira de artesanía de Outeiro de Rei simboliza a mestura do mellor pasado de Galicia coas técnicas e ideas de vangarda
Outeiro de Rei (Lugo), 4 de xullo de 2015.- O conselleiro de Economía e Industria, Francisco Conde, destacou hoxe que a IX edición da feira de Artesanía de Outeiro de Rei simboliza “a mestura do mellor pasado co máis brillante futuro, unindo a nosa tradición, a nosa identidade, coas novas creatividades, técnicas e ideas”. Conde inaugurou esta mostra de artesanía e alimentación, que se celebra hoxe e que conta con preto de 100 postos, entre os que se atopan as olarías con máis tradición de Galicia, “polas que Outeiro de Rei se fixo un merecido sitio na historia da artesanía galega”, así como verdadeiros líderes das últimas tendencias da artesanía galega, como Idoia Cuesta, que vén de facerse co Premio Nacional de Artesanía.
En concreto, Idoia Cuesta elaborou unha árbore decorativa utilizando vimbio seco, cuxa creación estivo aberta aos asistentes, e a feira conta ademais con demostracións en vivo o das olerías de tradición que perviven en Galicia: a de Bonxe en Outeiro de Rei, a de Gundivós (Sober, Lugo), a de Buño (Malpica de Bergantiños, A Coruña) e a de Niñodaguia (Ourense). Con reclamos coma eses, e a piques de acadar a década de funcionamento, “a feira de artesanía de Outeiro de Rei é un referente xa non da provincia de Lugo, senón de toda Galicia”, sinalou o conselleiro.
A feira, situada nas inmediacións da casa do Concello, acolle a postos artesáns de especialidades como, ademais da olería e a cestería, madeira, coiro, ferro, prata, bixutería, tecidos, instrumentos musicais, gancho e calceta, bordado á man, traxes tradicionais, xabóns e cosmética natural, feltro ou xogos. O programa complétase con distintas actividades paralelas, que inclúen unha mostra de produtos de alimentación, unha demostración de traballos forestais con motoserra, unha concentración de coches clásicos, e a I Carreira Solidaria do Concello, que busca recadar fondos contra o cancro infantil e da que Conde sinalou que amosa o “espírito solidario e traballador” do municipio.
Máis información -
03 Xullo, 2015A Xunta sinala que a IV Feira Corazón da Artesanía suporá un novo impulso ao sector e á posta en valor dos Pendellos de Agolada
Agolada (Pontevedra), 3 de xullo de 2015.- O conselleiro de Economía e Industria, Francisco Conde, e o de Cultura, Educación e Ordenación Universitaria, Román Rodríguez, inauguraron hoxe o Corazón da Artesanía. IV Encontro da Artesanía Tradicional e Popular de Galicia, no que ata o domingo poderá verse o traballo de 50 artesáns de toda Galicia, nun completo programa no que as demostracións en vivo de oficios, a música e a gastronomía volven encher de vida o conxunto histórico-artístico dos Pendellos, no que os visitantes poderán mesmo iniciarse co torno e a cestería ou participar na elaboración dunha peza colectiva de patchwork.
O conselleiro de Economía destacou na súa intervención que esta nova edición da cita que se ten consolidado como a cita anual de referencia da Artesanía de Galicia “suporá un novo impulso ao sector e á dinamización económica dos Pendellos e Agolada”. Do mesmo xeito, lembrou o obxectivo da Xunta de seguir afianzando a competitividade do sector artesán galego, impulsando a internacionalización, apostando pola innovación e a colaboración con outras disciplinas, e a incorporación do comercio electrónico, no que xa venden un 20% dos artesáns galegos.
Conde, que sinalou que unha das novidades deste ano de Corazón da Artesanía é a ampliación das actividades para que os nenos e as nenas poidan iniciarse na artesanía, incidiu na importancia de avanzar no relevo xeracional nos oficios artesanais. Así, lembrou proxectos como Enredando, artesanía na escola, no que participaron este ano 2.500 nenos e nenas de toda Galicia, ou Facemos marca. Medrando cos artesáns, que contempla diferentes accións para atraer novos profesionais ao sector. Ademais, destacou que nos dous últimos anos aumentaron en preto dun 15% o número de obradoiros inscritos no Rexistro Xeral de Artesanía de Galicia. Recordou así mesmo o conselleiro de Economía e Industria que para seguir abrindo oportunidades de negocio para os artesáns galegos visitará a partir de mañá Os Pendellos o xefe de compras da empresa HP France, con 90 tendas en Xapón e presenza en Estados Unidos e Francia.
Pola súa parte, o conselleiro de Cultura e Educación, Román Rodríguez, situou aos Pendellos como “un referente da cultura e da forma de vida tradicional galegas” no que se refire ás prácticas e usos levados a cabo neles. “Son, pois, parte do noso patrimonio cultural”, subliñou Román Rodríguez, quen destacou o traballo conxunto entre administracións para rehabilitar ditos inmobles e volver a darlles utilidade, reflectida agora nesta feira.Programa para todos os públicos
No encontro Corazón da Artesanía, organizado pola Consellería de Economía e Industria, tradición e vangarda van da man. O programa inclúe tanto exposición e venda de produtos artesanais e demostracións en vivo de oficios como showcookings de cociñeiros do grupo nove, degustacións e venda de produtos gastronómicos, con máis de 40 postos, workshops, presentacións de proxectos relacionados coa artesanía, conversas con artesáns de referencia, exposicións, actuacións musicais e talleres participativos de artesanía para o público infantil e adulto.
O programa inclúe hoxe a presentación do proxecto Centro do viño, eixo dinamizador do enoturismo na Ribeira Sacra, e conversas con Idoia Cuesta, premio nacional de Artesanía 2014 na categoría Produto, e Manuel González, presidente da Asociación Galega de Artesáns, que presentará a APP das Rutas de Artesanía de Galicia, premiada tamén nos Premios Nacionais, na categoría Promociona para Entidades Públicas. Ás oito da tarde está previsto o primeiro dos showcookings desta edición, a cargo da cociñeira Lucía Freitas do restaurante A Tafona de Santiago de Compostela, para rematar ás 22 horas co concerto de Guadi Galego.
O programa para mañá comezará ás 11:30 coa iniciativa “Coas mans da experiencia”, na que tres veteranos de referencia do sector artesán galego, o cesteiro Antonio Suárez, de Vigo, o zoqueiro Alfonso Ferro, de Vila de Cruces e o oleiro Aparicio Añón, de Malpica conversarán sobre os seus máis de 40 anos de traxectoria no sector.
No marco da iniciativa Artesanía no prato, na que se aposta pola introdución de pezas de Artesanía de Galicia na gastronomía, o chef do restaurante España de Lugo Héctor López ofrecerá dous showcookings ás 13:30 horas e ás 15 horas, mentres que ás 20:00 horas será o turno de Alberto G. Prelcic, do restaurante Silabario de Tui. Ademais, o deseñador Martín Azúa presentará ás 19:30 o proxecto Food Line, como punto de partida para a elaboración dunha liña gourmet de produto artesán galego.
Ademais, ás 17 horas presentarase o II certame de cantería Vento de Pedra, de Cabana de Bergantiños, e ás 17:30 será a presentación do proxecto da Consellería de Economía e Industria Facemos Marca, na que participará Luis González Bahamonde, xerente de Ardentía. Xa ás 18:30 horas Media Lúa e o deseñador Manuel García Torres falarán sobre a iniciativa Nossiss Glasses, na que colaboran para a elaboración de monturas de gafas artesanais en coiro.
Máis información
As actuacións musicais do sábado correrán a cargo da Banda Municipal de Agolada, que actuará ás 13 horas, e de Odaiko& A Magnifique Bande dos Homes sen Medo, que actuarán a partir das 21 horas. -
02 Xullo, 2015Unha vintena de artesáns e empresas do sector agroalimentario de Lugo participan desde mañá ata o domingo no Corazón da Artesanía en Agolada
Santiago, 2 de xullo de 2015.- Unha vintena de artesáns e empresas do sector agroalimentario da provincia de Lugo participan desde mañá e ata o domingo no Corazón da Artesanía. IV Encontro da Artesanía Tradicional e Popular de Galicia, un encontro organizado pola Consellería de Economía e Industria no conxunto histórico-artístico de Os Pendellos, no municipio pontevedrés de Agolada, no que tradición e vangarda van da man e que se ten consolidado como o referente anual do sector.
O programa inclúe tanto exposición e venda de produtos artesanais de toda Galicia e demostracións en vivo de oficios como showcookings, degustacións e venda de produtos gastronómicos, workshops, presentacións de proxectos relacionados coa artesanía, conversas con artesáns de referencia, exposicións, actuacións musicais e talleres participativos de artesanía para o público infantil e adulto.
Entre os artesáns da provincia de Lugo que amosarán o seu traballo nos Pendellos están Elías González, oleiro de Gundivós (Sober); Murúa, empresa de cantería de Antas de Ulla a cargo de David Soengas; e Juan Gayoso, de Lugo, que se dedica á montaxe de moscas para a pesca. Tamén participará a ceramista Lucía Catuxo, de Trabada; o obradoiro de Tornería de Madeira Armaior, de Quiroga; así como Xaneco Obradoiro de Instrumentos Musicais, de Outeiro de Rei. Ademais, na iniciativa Artesanía no Prato empregaranse pezas de Cerámica Regal, de Viveiro.
No tocante aos postos de produtos de alimentación de calidade, no Corazón da Artesanía estarán presentes as empresas lucenses Cervexa Artesá Aloumiña (Lugo); Artesás de Noces, de Lugo; e Secretos de Galicia, tamén de Lugo, dedicada á comercialización de repostería, confitería, bolería e bombóns elaborados en Galicia; así como Granxa Maruxa, de Monterroso, que elabora galletas de nata. Tamén se poderán ver os postos de Cafés Primordiale e Setas Silvestres e Grelos de Lugo, ambos de Vilalba; Currimar Conservas Tradicionales de Xove; Milhulloa, de Palas de Rei (Lugo), centrada no cultivo ecolóxico, tanto de plantas medicinais como de hortalizas; Caurelor, de Folgoso do Courel, que elabora mermeladas de froitas; e Ganado de Lemos, de Monforte.
A xornada de mañá comezará ás 11:30 horas coa inauguración por parte do conselleiro de Economía e Industria, Francisco Conde, da feira, na que ademais dos artesáns participan 46 empresas de produtos alimentarios de calidade. A partir das 12:30 terá lugar no espazo O Paladar a presentación do proxecto Centro do viño: eixo dinamizador do enoturismo na Ribeira Sacra, a cargo de Humberto Loureiro, que se completará cunha cata de viños da Ribeira Sacra.
Tamén o venres pola mañá comezarán dous dos catro cursos especializados que se inclúen na programación do Encontro. Trátase de A asa. Análise, práctica e deseño, impartido polo deseñador de orixe libanesa Assaad Awad, que ten colaborado con Thierry Mugler, Mario Testino, Lady Gaga ou Madonna. O horario do curso será de 11:30 a 14:00 e de 16:00 a 20:00 horas, durante os tres días da feira. O mesmo horario que Oficios de moda. Sombreirería con novos materiais, no que os participantes poderán coñecer da man da experta artesá pontevedresa Viviana Araújo as novas correntes na introdución de materiais non habituais para a elaboración e confección de complementos de moda, especialmente na sombreirería.
O sábado comezarán os outros dous cursos de formación incluídos no Corazón da Artesanía, centrados na fotografía. Fotografía para dispositivos móbiles – Artesanía no prato, impartido polo comunicador audiovisual David Cabezón (Santiago de Compostela) e Fotografía aplicada á artesanía, a cargo do fotógrafo alemán afincado en Lugo Peter Scheneider.
Mañá pola tarde, no Espazo Multidisciplinar, destacan as presentacións dos dous proxectos galegos gañadores dos Premios Nacionais de Artesanía 2014. A partir das 17:00 horas, a cesteira afincada en Outeiro de Rei, Idoia Cuesta, gañadora do Premio Produto, presentará o proxecto Sinerxías creativas: artesanía&deseño. Unha hora máis tarde, Manuel González, presidente da Asociación Galega de Artesáns (AGA), presentará a App das Rutas de Artesanía de Galicia, que resultaron recoñecidas con este galardón na categoría Promociona para Entidades Privadas.
A partir das 20:00 horas, no espazo O Paladar, a cociñeira Lucía Freitas, do restaurante A Tafona (Santiago de Compostela), será a encargada de abrir as degustacións da iniciativa Artesanía no prato, coa que se pretende achegar a artesanía ás novas tendencias da gastronomía galega. Catro chefs pertencentes ao Grupo Nove serán os responsables de distintos showcookings nos que elaborarán menús degustación con produtos galegos de calidade, que presentarán en pezas da marca Artesanía de Galicia. Os cociñeiros empregarán pezas de cerámica, de madeira e de téxtil elaborados por oito obradoiros artesáns galegos. O sábado será a quenda de Alberto C. Prelcic (Silabario, Tui) e Héctor López (Restaurante España, Lugo), mentres que o domingo estará en Agolada Javier Rodríguez Ponte “Taky” (Catering Boketé, A Coruña).A xornada do sábado pecharase coa actuación de Guadi Galego, que presentará o seu segundo disco en solitario, Lúas de outubro e agosto, a partir das 22:00 na Praza do Concello, unha vez rematada a feira.
Talleres participativos
O IV Encontro de Artesanía Tradicional e Popular contará entre o seu amplo programa de actividades cunha programación específica destinada ao público infantil. A través da Fundación Centro Galego da Artesanía e do Deseño organízanse talleres para iniciar os máis pequenos en diferentes oficios artesanais e que estarán centrados no traballo co papel, a elaboración de instrumentos musicais, a reciclaxe ou gastronomía.A artesá Palmira Castro, do obradoiro Mimadriña (Fisterra), impartirá dende mañá e ata o domingo o taller para nenos e nenas Elaboración de guirnalda decorativa, a partir de barquiñas e peixes de origami, cosidas cunha máquina Singer centernaria. O taller realizarase en horario de 11:30 a 14:00 e de 17:00 a 21:00 horas.
O luthier Xaneco Tubío (Outeiro de Rei) encargarase da actividade Elaboración de xoguetes sonoros, que se realizará o venres, o sábado e o domingo de 11:30 a 14:00 e de 17:00 a 21:00 horas, tamén destinado aos máis pequenos. Este obradoiro ten o obxectivo de ensinarlle ao público infantil do século XXI unha serie de xoguetes sonoros que os nenos galegos elaboraban ata mediados do século XX aproveitando os elementos que a natureza lles proporcionaba.
As tardes do venres, do sábado e do domingo, de 17:00 a 19:00 horas, a Praza do Concello estará dedicada ao taller Substitúe o lixo por vida impartido pola cooperativa O Canto da Balea (Carnota). A actividade consiste en clasificar o lixo presente nas nosas costas, mediante o xogo, e substituílo por unha especie mariña. O xogo complementarase co obradoiro Artelixo, no que os máis pequenos poderán transformar este lixo en obxectos decorativos.
Outra das actividades destinadas ao público infantil terá lugar o domingo pola tarde. Trátase do taller Artesanía no Prato, na que aprenderán a elaborar pratos fríos e posteriormente presentalos con pezas de artesanía como soporte. Para esta actividade é necesaria a inscrición previa na páxina artesaniadegalicia.xunta.es.
A programación compleméntase con talleres gratuítos de iniciación a tres oficios artesanais e que estarán abertos á participación de público tanto adulto como infantil. Comezarán mañá e desenvolveranse ata o domingo, en horario de 11:30 a 14:00 pola mañá e de 17:00 a 21:00 h de tarde, agás no caso do taller de centón cuxo horario de tarde será de 16:00 a 21:00 horas. Os ceramistas Susana González Amado e Antón Román impartirán “Iniciación ao torno cerámico”, no Pendello Cerámica, a cesteira Lola Tourón encargarase do taller “Iniciación á cestería”, no Pendello Cestería, e as artesás téxtiles Aurelia Costas e María del Mar Fernández traballarán cos visitantes no Pendello Centón na elaboración dunha peza conxunta no marco do taller “Iniciación ao centón”.
Ademais, o venres tamén botarán a andar a exposicións Oficios de Moda. Ferramentas de sombreirería, na que se expoñerá a colección da artesá pontevedresa Viviana Araújo, na que se achega unha visión sobre a confección de sombreiros e tocados nas diferentes épocas. Tamén se poderá ver Penumbrosos, unha serie de cadros que Álvaro Negro expoñerá no espazo do que no seu día foi muíño e serradoiro familiar.
A organización destas actividades de divulgación e posta en valor da artesanía forma parte do Plan de Artesanía de Galicia, impulsado pola Consellería de Economía e Industria para promover o talento do sector artesanal galego e consolidar un sector competitivo e transversal.
Máis información -
02 Xullo, 2015O Corazón da Artesanía latexa de novo desde mañá e ata o domingo en Agolada con demostracións en vivo, gastronomía e música
Santiago, 2 de xullo de 2015.- O Corazón da Artesanía. IV Encontro da Artesanía Tradicional e Popular de Galicia arranca mañá no conxunto histórico-artístico dos Pendellos de Agolada (Pontevedra), onde se poderá ver ata o domingo o traballo de máis de 50 artesáns de toda Galicia de diferentes oficios. Este encontro organizado pola Consellería de Economía e Industria no que tradición e vangarda van da man tense consolidado como o referente anual do sector. O programa inclúe tanto exposición e venda de produtos artesanais e demostracións en vivo de oficios como showcookings, degustacións e venda de produtos gastronómicos, workshops, presentacións de proxectos relacionados coa artesanía, conversas con artesáns de referencia, exposicións, actuacións musicais e talleres participativos de artesanía para o público infantil e adulto.
A xornada de mañá comezará ás 11:30 horas coa inauguración por parte do conselleiro de Economía e Industria, Francisco Conde, da feira, na que ademais dos artesáns participan 46 empresas de produtos alimentarios de calidade. A partir das 12:30 terá lugar no espazo O Paladar a presentación do proxecto Centro do viño: eixo dinamizador do enoturismo na Ribeira Sacra, a cargo de Humberto Loureiro, que se completará cunha cata de viños da Ribeira Sacra.
Tamén o venres pola mañá comezarán dous dos catro cursos especializados que se inclúen na programación do Encontro. Trátase de A asa. Análise, práctica e deseño, impartido polo deseñador de orixe libanesa Assaad Awad, que ten colaborado con Thierry Mugler, Mario Testino, Lady Gaga ou Madonna. O horario do curso será de 11:30 a 14:00 e de 16:00 a 20:00 horas, durante os tres días da feira. O mesmo horario que Oficios de moda. Sombreirería con novos materiais, no que os participantes poderán coñecer da man da experta artesá pontevedresa Viviana Araújo as novas correntes na introdución de materiais non habituais para a elaboración e confección de complementos de moda, especialmente na sombreirería.
O sábado comezarán os outros dous cursos de formación incluídos no Corazón da Artesanía, centrados na fotografía. Fotografía para dispositivos móbiles – Artesanía no prato, impartido polo comunicador audiovisual David Cabezón (Santiago de Compostela) e Fotografía aplicada á artesanía, a cargo do fotógrafo alemán afincado en Lugo Peter Scheneider.
Mañá pola tarde, no Espazo Multidisciplinar, destacan as presentacións dos dous proxectos galegos gañadores dos Premios Nacionais de Artesanía 2014. A partir das 17:00 horas, a cesteira afincada en Outeiro de Rei, Idoia Cuesta, gañadora do Premio Produto, presentará o proxecto Sinerxías creativas: artesanía&deseño. Unha hora máis tarde, Manuel González, presidente da Asociación Galega de Artesáns (AGA), presentará a App das Rutas de Artesanía de Galicia, que resultaron recoñecidas con este galardón na categoría Promociona para Entidades Privadas.
A partir das 20:00 horas, no espazo O Paladar, a cociñeira Lucía Freitas, do restaurante A Tafona (Santiago de Compostela), será a encargada de abrir as degustacións da iniciativa Artesanía no prato, coa que se pretende achegar a artesanía ás novas tendencias da gastronomía galega. Catro chefs pertencentes ao Grupo Nove serán os responsables de distintos showcookings nos que elaborarán menús degustación con produtos galegos de calidade, que presentarán en pezas da marca Artesanía de Galicia. Os cociñeiros empregarán pezas de cerámica, de madeira e de téxtil elaborados por oito obradoiros artesáns galegos. O sábado será a quenda de Alberto C. Prelcic (Silabario, Tui) e Héctor López (Restaurante España, Lugo), mentres que o domingo estará en Agolada Javier Rodríguez Ponte “Taky” (Catering Boketé, A Coruña).A xornada do sábado pecharase coa actuación de Guadi Galego, que presentará o seu segundo disco en solitario, Lúas de outubro e agosto, a partir das 22:00 na Praza do Concello, unha vez rematada a feira.
Talleres participativos
O IV Encontro de Artesanía Tradicional e Popular contará entre o seu amplo programa de actividades cunha programación específica destinada ao público infantil. A través da Fundación Centro Galego da Artesanía e do Deseño organízanse talleres para iniciar os máis pequenos en diferentes oficios artesanais e que estarán centrados no traballo co papel, a elaboración de instrumentos musicais, a reciclaxe ou gastronomía.A artesá Palmira Castro, do obradoiro Mimadriña (Fisterra), impartirá dende mañá e ata o domingo o taller para nenos e nenas Elaboración de guirnalda decorativa, a partir de barquiñas e peixes de origami, cosidas cunha máquina Singer centernaria. O taller realizarase en horario de 11:30 a 14:00 e de 17:00 a 21:00 horas.
O luthier Xaneco Tubío (Outeiro de Rei) encargarase da actividade Elaboración de xoguetes sonoros, que se realizará o venres, o sábado e o domingo de 11:30 a 14:00 e de 17:00 a 21:00 horas, tamén destinado aos máis pequenos. Este obradoiro ten o obxectivo de ensinarlle ao público infantil do século XXI unha serie de xoguetes sonoros que os nenos galegos elaboraban ata mediados do século XX aproveitando os elementos que a natureza lles proporcionaba.
As tardes do venres, do sábado e do domingo, de 17:00 a 19:00 horas, a Praza do Concello estará dedicada ao taller Substitúe o lixo por vida impartido pola cooperativa O Canto da Balea (Carnota). A actividade consiste en clasificar o lixo presente nas nosas costas, mediante o xogo, e substituílo por unha especie mariña. O xogo complementarase co obradoiro Artelixo, no que os máis pequenos poderán transformar este lixo en obxectos decorativos.
Outra das actividades destinadas ao público infantil terá lugar o domingo pola tarde. Trátase do taller Artesanía no Prato, na que aprenderán a elaborar pratos fríos e posteriormente presentalos con pezas de artesanía como soporte. Para esta actividade é necesaria a inscrición previa na páxina artesaniadegalicia.xunta.es.
A programación compleméntase con talleres gratuítos de iniciación a tres oficios artesanais e que estarán abertos á participación de público tanto adulto como infantil. Comezarán mañá e desenvolveranse ata o domingo, en horario de 11:30 a 14:00 pola mañá e de 17:00 a 21:00 h de tarde, agás no caso do taller de centón cuxo horario de tarde será de 16:00 a 21:00 horas. Os ceramistas Susana González Amado e Antón Román impartirán “Iniciación ao torno cerámico”, no Pendello Cerámica, a cesteira Lola Tourón encargarase do taller “Iniciación á cestería”, no Pendello Cestería, e as artesás téxtiles Aurelia Costas e María del Mar Fernández traballarán cos visitantes no Pendello Centón na elaboración dunha peza conxunta no marco do taller “Iniciación ao centón”.
Ademais, o venres tamén botarán a andar a exposicións Oficios de Moda. Ferramentas de sombreirería, na que se expoñerá a colección da artesá pontevedresa Viviana Araújo, na que se achega unha visión sobre a confección de sombreiros e tocados nas diferentes épocas. Tamén se poderá ver Penumbrosos, unha serie de cadros que Álvaro Negro expoñerá no espazo do que no seu día foi muíño e serradoiro familiar.
A organización destas actividades de divulgación e posta en valor da artesanía forma parte do Plan de Artesanía de Galicia, impulsado pola Consellería de Economía e Industria para promover o talento do sector artesanal galego e consolidar un sector competitivo e transversal.
-
02 Xullo, 2015A Mesa Provincial de Comercio Local aproba os proxectos de dinamización comercial presentados por tres entidades da provincia
A Coruña, 2 de xullo de 2015.- A delegada territorial da Xunta na provincia, Belén do Campo, participou hoxe nunha nova reunión da Mesa Provincial de Comercio Local da Coruña, que agrupa a administracións públicas, asociacións de comerciantes e consumidores e representantes dos distintos concellos. Tamén estiveron presentes os deputados provinciais Antonio Cañás e Begoña Freire, a presidenta da Asociación Galega de Amas de Casa, Consumidores e Usuarios “Brétema”, Rosa Otero, o presidente da Federación Galega de Comercio, Miguel Agromayor, e o xefe de sección de Promoción Económica e Emprego da Deputación Provincial da Coruña, Rafael Díaz-Aguado.
Neste encontro, supervisáronse tres proxectos presentados por varias asociacións comerciais con competencias na provincia, trámite necesario para que poidan concorrer ás ordes de axudas convocadas polo Goberno autonómico. Por unha banda, o Gremio de Xoieiros, Prateiros e Reloxeiros da Coruña, introduciu un proxecto para financiar a promoción das vendas en todos os establecementos comerciais asociados. Pola súa parte, a Federación Galega de Comercio expuxo unha proposta que ten como finalidade o financiamento dunha tenda online, un club de fidelización e os servizos xerais de asesoramento. Por último, a Federación de Empresarios de Barbanza amosou unha iniciativa co obxectivo de revitalizar o comercio de proximidade e a incentivación do consumo nas comarcas de Barbanza, Sar, Noia-Muros e Xallas,
Cumprimento da Lei de comercio interior de Galicia
A convocatoria da reunión da Mesa Provincial de Comercio Local faise en cumprimento da Lei de comercio interior de Galicia. Este órgano está pensado para fomentar o diálogo e a coordinación entre a administración, os comerciantes e os consumidores no deseño e execución das políticas comerciais que lles afectan. Neste senso, Do Campo subliñou que se está a traballar para “impulsar a colaboración entre os membros do sector para a optimización dos recursos”. Con esta norma, indicou, está a disposición dos comerciantes unha serie de instrumentos que teñen como obxectivo a mellora e a modernización do comercio galego, así como a solución dos problemas que lles afectan.Entre as ferramentas que recolle a lei están as chamadas mesas locais de comercio, entendidas como un lugar de encontro e un foro de debate, onde teñen voz e voto o comercio de proximidade, os consumidores e os propios concellos. A mesa provincial asume as funcións da administración local naqueles concellos que non contan cun mínimo de 20 comercios minoristas ou nos que non existe unha asociación local de comerciantes.
Funcións da Mesa Provincial do Comercio Local
Entre as tarefas que desenvolve a Mesa Provincial do Comercio Local están as de informar sobre as campañas de promoción que se desenvolven con fondos públicos, elaborar informes para a realización des feiras de oportunidades, actuar como órgano consultivo sobre todas as cuestións que afecten ao comercio retallista ou ser oída na elaboración de plans de tráfico e de ordenación urbana dos concellos integrantes, entre outras. Tamén está a servir como plataforma para trasladar aos municipios representados as medidas, iniciativas e propostas en materia comercial.En definitiva, trátase de contar cunha ferramenta eficaz para dotar de maior dinamismo, proxección e modernidade ao pequeno comercio, “máis aínda nun contexto de crise económica como o actual”, indicou a representante autonómica. “Pretendemos que o sector se decate de que a través da unión de todos os axentes se pode ser máis competitivo e chegar a negociar, por exemplo, créditos cos bancos, as tarifas da luz ou outros asuntos que poidan beneficiar a súa actividade”, engadiu.
Máis información -
29 Xuño, 2015Os oficios tradicionais e as novas tendencias danse cita esta fin de semana na feira corazón da artesanía nos pendellos de Agolada
Santiago, 29 de xuño de 2015.- Os oficios tradicionais e as novas tendencias daranse cita unha vez máis esta fin de semana no conxunto histórico-artístico dos Pendellos de Agolada, que do 3 ao 5 de xullo acollerán a cuarta edición do Corazón da Artesanía. Encontro da Artesanía Tradicional e Popular de Galicia, organizado pola Consellería de Economía e Industria. Tal e como salientou esta mañá a directora xeral de Comercio, Sol Vázquez Abeal, na presentación do programa, na que tamén participaron o tenente de alcalde de Agolada, Héctor Martínez, e a xerente da Fundación Centro Galego da Artesanía e do Deseño, Elena Fabeiro, así como o presidente da Asociación Galega de Artesáns, Manuel González, e a Asociación Galega de Artesáns Tradicionais, Albino Quinteiro, o evento, consolidado como un referente anual do sector, ofrece un concepto de artesanía moi amplo, porque se basea no produto artesán galego e na súa interrelación con outros sectores como a gastronomía, o turismo, a moda, a decoración ou a música, así como no seu achegamento a toda a sociedade.
Sol Vázquez destacou a riqueza e heteroxeneidade do sector artesán galego, que quedará patente nos diferentes postos de exposición, venda e demostración de oficios que ocuparán o espazo dos Pendellos, un entorno único, un antigo recinto da feira restaurado que volve así á vida. Nesta cuarta edición, empregaranse 8 das novas edificacións que foron rehabilitadas nos últimos meses, o que repercutirá tamén nunha ampliación tanto no número de obradoiros artesáns e de postos de produtos alimentarios como doutras actividades como charlas sobre oficios, talleres participativos para o público infantil e adulto, exposicións, cursos de formación e presentación de diferentes proxectos de artesanía.
Tal e como destacou Vázquez Abeal, co obxectivo de abrir novas oportunidades de negocio para os artesáns galegos está prevista a participación no encontro do xaponés Kiyotaka Imai, xefe de compras da compañía HP France, con 90 tendas de decoración e moda en Xapón e presenza en Estados Unidos e Francia. Tamén asistirán ao evento dous xornalistas da empresa, que edita diferentes publicacións especializadas.
No encontro poderán ver o traballo dun total de 50 artesáns de oficios tan variados como cestería, instrumentos musicais, ourivería e xoiería, olería e cerámica, téxtil, elaboración de zocos e figuras de pan, cantería, montaxe de moscas para a pesca, marroquinería, follalatería, talla en madeira, zapatería, cerería, elaboración de redes, colareiras ou tornería. O Corazón de Artesanía incrementa considerablemente o número de empresas de alimentación que ofrecerán exposición e venda dos seus produtos, que chegan a 46. Entre as novidades atópanse produtos como xeados artesanais, cafés tostados en Galicia, carnes de razas autóctonas ou un proxecto de pesca artesanal sostible.
Premios Nacionais de Artesanía
Os que acudan a Agolada poderán asistir ás presentacións de diferentes proxectos relacionados co traballo dos profesionais do sector artesán entre as que destacan “Sinerxías creativas: artesanía & deseño”, a cargo de Idoia Cuesta, gañadora do Premio Nacional de Artesanía 2014 na categoría de Produto. Tamén se presentará a App das Rutas de Artesanía de Galicia da Asociación Galega de Artesáns, Premio Nacional de Artesanía 2014 na categoría Promociona para Entidades Privadas.Un ano máis, haberá espazo para as exposicións, e así, podera visitarse Oficios de moda. Ferramentas de sombreiría, unha visión sobre a confección de sombreiros e tocados nas diferentes épocas a través do papel da muller como motor da creatividade na moda ao longo da historia. Tamén estará aberta “Penumbrosos”, unha serie de cadros de Álvaro Negro.
Formación
No eido da formación especializada, o venres e o sábado celebrarase o workshop A asa. Análise, práctica e deseño, impartido polo recoñecido deseñador de orixe libanesa Assaad Awad, que ten colaborado con Thierry Mugler, Mario Testino, Lady Gaga ou Madonna. O sábado e o domingo, o fotógrafo alemán Peter Schneider traballará sobre Fotografía aplicada á artesanía. O domingo o comunicador audiovisual David Cabezón levará un workshop sobre Fotografía para dispositivos móbiles. Artesanía no prato e, ao longo de toda a fin de semana, a artesá téxtil pontevedresa Viviana Araújo impartirá Oficios de moda. Sombreirería con novos materiais.Por outra banda, neste Corazón da Artesanía incrementáronse as actividades especificamente dirixidas aos máis pequenos, co obxectivo de introducilos en diferentes oficios artesanais. Así, poderán experimentar coa elaboración de instrumentos musicais, o origami, a reciclaxe ou a presentación en pezas de artesanía de pratos fríos que previamente elaborarán. Ademais, tanto o público infantil como o adulto poderán aprender a usar o torno cerámico, iniciarse na cestería ou participar na elaboración dunha peza colectiva de “patchwork”.
Outra das novidades do programa de actividades desta cuarta edición é Coas mans da experiencia, unha iniciativa na que o sábado pola mañá conversarán sobre os seus máis de 40 anos de traxectoria no sector tres referentes da artesanía galega: o cesteiro Antonio Suárez (Vigo), o zoqueiro Alfonso Ferro (Vila de Cruces) e o oleiro Aparicio Añón (Malpica de Bergantiños).Artesanía no prato
Tamén se seguirá a afondar na relación entre gastronomía e artesanía, e neste sentido o deseñador Martín Azúa presentará o seu proxecto Food Line, como punto de partida para a elaboración dunha liña gourmet de produto artesán galego. Ademais, un ano máis, “Artesanía no prato” volve ter un espazo destacado na programación do Corazón da Artesanía. Nesta edición, os cociñeiros do grupo Nove Alberto G. Prelcic, do restaurante Silabario de Tui; Lucía Freitas, do establecemento A Tafona, en Santiago; Javier Rodríguez Ponte “Taky”, de Catering Boketé, na Coruña; e Hector López, do restaurante España, de Lugo, serán os encargados de showcookings nos que elaborarán menús degustación con produtos galegos de calidade, que se presentarán en pezas de Artesanía de Galicia. Moitos dos produtos que se empregarán nas eleboracións poderanse atopar á venda no propio Encontro, incluída a maridaxe, para a que se proporán algúns dos viños expostos e mesmo cervexas artesanais. Estas actividades, cuxo horario se pode consultar na web de Artesanía de Galicia, é gratuíta, precisan inscrición previa no teléfono 981573017, en horario de 9:00 a 14:00 horas, ou no enderezo correo@adaptaconsultores.com.O horario de apertura da feira é de 11:30 a 21:30 horas, aínda que as actividades se estenderán ata a noite grazas ás actuacións musicais de Guadi Galego, o venres ás 22 horas, e Odaiko e A Magnifique Bande dos Homes sen Medo, o sábado ás 21 horas, que lle permitirán aos visitantes continuar coa xornada lúdica. A sesión vermú Lodeiros amenizada polo grupo Os lobos do espacio, o domingo ás 13:00, a actuación da Banda Municipal de Música de Agolada o sábado ás 13:00 e o espectáculo do grupo de música e baile tradicional Brincadeira, o domingo ás 20:00, completan a programación musical.
Porase á disposición dos visitantes unha zona de acampada gratuíta, así como un servizo de autobuses de balde que unirán Agolada con Lalín e, como novidade desta cuarta edición, con Melide. Os horarios poden consultarse na web de Artesanía de Galicia. Ademais, a organización da feira habilitará unha carpa próxima aos Pendellos onde se ofrecerá un servizo de comida para os visitantes, que poderán facer as súas reservas chamando ao teléfono 608757564.
A organización deste encontro, forma parte da estratexia de impulso ao sector artesán que desenvolve a Consellería de Economía e Industria, e enmárcase no Plan de Artesanía de Galicia, que ten por obxectivo conseguir un sector artesán forte e sostible no tempo e que contribúa ao crecemento da economía galega, incidindo na competitividade empresarial e a potenciación do talento galego.
Máis información -
26 Xuño, 2015Tres veteranos de referencia do sector artesán conversarán na Feira Corazón da Artesanía sobre a súa longa experiencia
Santiago, 26 de xuño de 2015.- Tres veteranos de referencia do sector artesán galego conversarán na feira Corazón da Artesanía. IV Encontro de Artesanía Tradicional e Popular de Galicia que se celebra en Agolada (Pontevedra) entre os días 3 e 5 de xullo dos máis de 40 anos de traxectoria nos seus oficios. O cesteiro Antonio Suárez, de Vigo, o zoqueiro Alfonso Ferro, de Vila de Cruces e o oleiro Aparicio Añón, de Malpica participarán o sábado pola mañá na iniciativa “Coas mans da experiencia”.
Trátase dunha serie de conversas con expertos artesáns, cuxa longa traxectoria profesional vén marcada pola aprendizaxe no obradoiro familiar, que foron forxando a súa mestría ao longo de toda unha vida de traballo dedicada ao oficio e que hoxe en día están considerados figuras de referencia nas súas respectivas especialidades e mestres de moitos dos profesionais que se foron incorporando ao sector da artesanía.
O cesteiro Antonio Suárez Dávila (Vigo) será o encargado de abrir estas conversas, a partir das 11:30 horas. Antonio vén dunha familia dedicada á cestería, aprendeu o oficio de neno e dedicou a súa vida á elaboración de cestos e á formación de profesionais e afeccionados. As coleccións de cestería tradicional de todas partes de Galicia que alberga o Centro de Artesanía Tradicional de Vigo e tamén o Museo do Mar, son froito do traballo de investigación e de recuperación levado a cabo por Antonio Suárez, referente inequívoco da cestería galega. Actualmente ten a súa tenda – taller na Rúa dos Cesteiros do casco antigo de Vigo e algunhas das súas pezas forman parte da colección de Artesanía de Galicia que se está a presentar nas feiras de decoración Tent London (Reino Unido) e Formex (Suecia).
Ás 12:00 horas, o zoqueiro Alfonso Ferro, de Merza (Vila de Cruces) falará sobre a súa traxectoria no taller familiar de elaboración de zocos, exemplo claro da evolución dun oficio tradicional, e que este ano 2015 cumpre 100 anos en activo. Grazas á combinación da marroquinería coa elaboración dos zocos, este taller conseguiu non só manter vivo un oficio tradicional e convertelo no seu modo de vida, senón modificar o uso tradicional do zoco creado para cubrir unha necesidade básica e convertelo nunha peza adaptada ás tendencias actuais da moda, chegando mesmo a ver o seu labor recoñecido co Premio Artesanía Contemporánea Antón Fraguas no ano 2010.
Aparicio Añón (Malpica de Bergantiños) falará a partir das 12:30 sobre o seu traballo nun dos catro centros de olería tradicional aínda activos hoxe en día en Galicia, Buño. Aparicio é na actualidade o oleiro de Buño máis antigo que se dedica a este oficio tradicional e o mestre de referencia para a maioría dos oleiros que comezan coa súa formación. No seu taller de olería combina as formas tradicionais con outras de novo deseño e ten participado en diferentes eventos de carácter internacional baixo a marca Artesanía de Galicia.
As conversas estarán conducidas por Pablo Quintana, fundador de Canela Producións editorial etnográfica, e estudoso e divulgador polifacético da cultura popular de Galicia e da zona occidental de Asturias.
O Corazón da Artesanía. IV Encontro de Artesanía Tradicional e Popular, que se celebra no conxunto histórico-artístico dos Pendellos de Agolada do 3 ao 5 de xullo, é un evento integral de divulgación e de posta en valor da artesanía e dos oficios artesáns, así como da súa interrelación con outras disciplinas artísticas. No amplo programa de actividades, centrado na exposición e venda de produtos artesanais e alimentarios de calidade, inclúense tamén actuacións musicais, formación especializada para artesáns e outras actividades nas que poderá participar o público asistente como showcookings, exposicións ou obradoiros de artesanía abertos ao público.
Máis información -
25 Xuño, 2015Feijóo salienta que o novo Plan de impulso ao comercio, dotado con 70 millóns de euros, permitirá completar a renovación do sector, impulsar o comercio electrónico e potenciar a excelencia como rasgo diferenciado do comercio galego
Santiago, 25 de xuño de 2015.- O presidente da Xunta, Alberto Núñez Feijóo, avanzou hoxe na rolda de prensa do Consello que o novo Plan de impulso ao comercio, dotado con 70 millóns de euros, permitirá completar a renovación do sector comercial, impulsar o comercio electrónico e potenciar a excelencia como rasgo diferenciado do comercio galego.
Así, grazas este Plan, incrementarase nun 15 por cento a cifra de emprendedores que traballan no sector, ata chegar a máis de 60.000 no ano 2020, recuperándose así o número que había ao inicio da crise económica; triplicarase a porcentaxe de empresas de menos de dez empregados que vendan en Internet, alcanzando un 14 por cento dos pequenos comercios que sexan capaces de estar na rede; e incrementarase nun 10 por cento o número de comercios que se asocien para competir, chegando á cifra de 20.000.
Medidas para impulsar o comercio en época de transición
Como lembrou Feijóo, a Xunta leva impulsado distintas medidas de apoio ao comercio. Así, no que vai de ano, lévanse destinados xa 10 millóns de euros a programas centrados en aspectos como a innovación, o relevo xeracional no comercio ou o impulso ás prazas de abastos.Segundo o titular da Xunta, “somos conscientes de que todas estas medidas deben de incardinarse nunha planificación actualizada que nos permita acompañar o sector na transición”. Así, como engadiu Feijóo, agora pásase “do plan que estivo vixente na pasada lexislatura pensado para un tempo de crise a un plan pensando para un tempo de recuperación, que é o que se está abrindo na economía galega”.
O mandatario galego fixo fincapé en que o Plan está traballado co sector e está “elaborado con medidas claras que totalizan 55 accións específicas”. Segundo asegurou, “o sector e a Administración fixemos un plan realista”.
Os tres grandes retos do Plan de impulso ao comercio
Como indicou Feijóo, o primeiro reto do Plan de impulso ao comercio é a renovación do sector. Para conseguilo, o titular da Xunta anunciou que se tomarán medidas específicas que buscarán incrementar a competitividade do comercio coa posta en marcha de accións de formación para difundir boas prácticas; a posta en marcha dun programa de axudas para a mellora das infraestruturas comerciais, con especial atención aos centros históricos, ás vilas e ás cidades galegas; a activación de apoios para a apertura de novos establecementos en concellos de zonas rurais de menos de 5.000 habitantes e tamén a creación de mapas con rutas de comercio vinculadas aos atractivos turísticos de Galicia.Do mesmo xeito, crearanse canles de distribución entre produtores e empresas de distribución para a eliminación de custos intermedios que redunden nun prezo final máis axeitado e que supoñen un incremento da competitividade. Para iso, a Xunta vai impulsar proxectos piloto de bolsas de produtos locais de determinadas zonas.
No relativo ao obxectivo darlle pulo ao comercio electrónico, o Goberno galego vai dirixir a maior parte dos recursos do Plan, o 40 por cento, á potenciación dun novo modelo de comercio co fin de impulsar novas fórmulas de comercialización dos produtos así como a mellora do deseño e a presentación dos mesmos. Para logralo, poñeranse en marcha unha bolsa de ideas de comercialización de produto co obxectivo de convertelas en iniciativas viables, crearase un programa piloto de innovación en formatos comerciais no eido das novas tecnoloxías e apoiarase o desenvolvemento de plataformas tecnolóxicas para impulsar o comercio electrónico, así como axudas para modernizar a imaxe dos establecementos comerciais, os centros comerciais abertos e as prazas de abastos.
Así mesmo, tamén se impulsará nas prazas de abastos a creación de espazos comerciais multifuncionais nos que teñan lugar actividades complementarias como demostracións culinarias, catas ou cursos de cociña. Ademais, entre as accións que se desenvolverán de forma máis inmediata está a activación de axudas para o desenvolvemento de aplicacións e de webs móbiles para os comercios.
En terceiro lugar, co fin de potenciar un comercio máis excelente a Xunta activará axudas para campañas de dinamización comercial e potenciará sistemas de fidelización de colectivos específicos; poñerá en marcha actuacións encamiñadas a potenciar un comercio sostible, implicado coa eficiencia enerxética e coa preservación do medio ambiente; potenciará a creación de ludotecas, de espazos infantís e salas de lactación nos máis de 50 centros comerciais abertos en Galicia; creará grupos de comercio de consumo responsable nas sete cidades galegas e tamén apoiará modelos comerciais que fomenten a redución do uso de envases e de bolsas así como a utilización de elementos biodegradables.
En definitiva, “tratamos xunto co sector de facer un acordo realista para os próximos anos, que reafirma o compromiso co comercio de proximidade como un dos sectores clave da economía da comunidade e tamén moi especialmente do comercio de proximidade nas zonas rurais, nos concellos de menos 5.000 habitantes”. Así mesmo, búscase reforzar a creación da riqueza e emprego en Galicia “como demostran os tres obxectivos que nos marcamos xuntos comerciantes e Xunta”.
Máis información -
24 Xuño, 2015Conde salienta que a aposta da empresa do téxtil D-Due pola calidade e o deseño é clave para o seu crecemento no mercado internacional
Rianxo (A Coruña), 24 de xuño de 2015.- O conselleiro de Economía e Industria, Francisco Conde, salientou hoxe na súa visita ás instalacións de D-Due en Rianxo xunto co presidente da compañía xaponesa HP France, Takanao Muramatsu, e na que tamén participou a creadora e deseñadora Charo Froján, a aposta desta empresa galega do sector téxtil pola calidade e o deseño como clave para o seu crecemento no mercado internacional.
Tal e como destacou o conselleiro, a colaboración de D-Due con HP France, que se espera reforzar con esta visita, ten permitido á compañía rianxeira xurdida dun pequeno taller familiar incrementar nun 30% as súas vendas ao exterior. Neste sentido, Froján resaltou que D-Due, cuxas prendas se caracterizan pola súa confección artesanal, leva cinco anos traballando xunto a HP France, polo que a visita do seu presidente supón para eles unha gran oportunidade para fortalecer a súa presenza no mercado xaponés, así como para xerar grandes expectativas no mercado estadounidense.
HP France conta con 90 tendas en Xapón dedicadas á decoración, a moda e o arte, e tamén distribúe os seus produtos en Francia e Estados Unidos, polo que se converte nun socio de primeira magnitude para D-Due. Esta exporta arredor do 70% da súa produción a mercados asiáticos. “Isto é unha clara visión de como para medrar, a internacionalización é unha oportunidade, e D-Due o está a facer sobre os requisitos claros do deseño, da calidade e da exclusividade dos seus produtos”, incidiu Conde.
Características distintivas de D-Due que tamén foron postas resaltadas polo presidente de HP France, quen neste contexto puxo en valor as potencialidades da marca Galicia e o seu desexo de impulsala.
O conselleiro apuntou que se espera que a visita de Takanao Muramatsu a Galicia permita que a vía de cooperación aberta con D-Due se poida extender a outras empresas galegas, e neste sentido, sinalou que no showroom da compañía de Rianxo se ten instalado un pop up con pezas de Artesanía de Galicia.
Conde sinalou que a alianza entre HP France e D-Due é un exemplo das oportunidades que a internacionalización ofrece ás pequenas e medianas empresas galegas, nas cales pon o foco a Estratexia de Internacionalización da Empresa Galega. Esta folla de ruta ten entre os seus obxectivos alcanzar as 8.000 empresas exportadoras en 2020, facendo das exportacións un motor de emprego e crecemento empresarial. “Imos a seguir traballando nesta dirección, a da calidade dos nosos produtos e a de achegar a Galicia novos mercados”, subliñou Conde.
Máis información -
23 Xuño, 2015A Xunta presenta ao sector turístico as vantaxes e requisitos para contar co selo de garantía Galicia Calidade
Santiago, 23 de xuño de 2015.- A Consellería de Economía e Industria, a través de Galicia Calidade, Turismo de Galicia e o Clúster do Turismo organizaron hoxe unha xornada para explicar aos asociados as vantaxes e requisitos para contar co selo de garantía. O acordo asinado entre estas entidades busca incorporar antes de que remate o ano 2015 dez novos establecementos. A concesión do selo Galicia Calidade responderá a valores arquitectónicos, medioambientais, paisaxísticos, culturais e gastronómicos galegos, esixindo a presenza de produtos de orixe galega nos establecementos recoñecidos.
Deste xeito, as mellores empresas turísticas galegas poderán aproveitar o impulso dunha marca, a de Galicia Calidade, recoñecida non só en toda España senón tamén no eido internacional, grazas á presenza global dos mellores produtos galegos. Galicia aproveitará a asociación que os consumidores fan hoxe entre produto galego e calidade, para trasladar esa mesma percepción ao ámbito turístico e potenciar a capacidade para atraer visitantes.
Entre os obxectivos perseguidos polo acordo asinado están o de pór en valor as características específicas do turismo galego respecto a outros valores estándar que xa están comprendidos nas normas sectoriais como a Q de Calidade Turística; mellorar a imaxe do turismo de Galicia a través do compromiso e cumprimento dos requisitos específicos que nos diferencian ou mellorar a imaxe e promover os produtos galegos, favorecendo sinerxías entre o sector turístico e o sector produtivo e agroalimentario galego.
Na presentación da xornada, a directora de Turismo de Galicia, Nava Castro destacou que as múltiples posibilidades que ten o turista á hora de elixir un destino fan que o sector turístico actual sexa moi competitivo e a calidade se converta xa nunha necesidade para permanecer neste complexo mercado. “Apostar pola calidade implica diferenciación e valor engadido e sitúa ao destino que se identifica como tal nunha posición de maior privilexio”, afirmou.
Neste senso, Nava Castro sinalou que o esforzo desde Turismo de Galicia é diario e insistente para dotar o destino da calidade que se merece.
A responsable de Turismo da Xunta resaltou que Galicia conta con 268 empresas certificadas coa Q de Calidade Turística, 131 areais galegos atesouran o distintivo de Bandeira Azul, 37 Soles Repsol iluminan 26 restaurantes galegos e a gastronomía galega acadou neste ano 12 Estrelas Michelin. “Todos estes distintivos testifican a calidade que está a acadar o sector turístico galego pero temos que continuar traballando conxuntamente procurando a exixencia constante, a mellora continua e a innovación como elemento indispensable para ser competitivos”, concluíu Nava Castro.
Pola súa parte, o presidente do Clúster de Turismo, Francisco González, sinalou que “coa firma do convenio demos o primeiro paso e hoxe podemos anunciar que o sector turístico conta xa cun marco de xeral cumprimento para poder integrarse dentro de Galicia Calidade". Así mesmo, o presidente do CTG destacou a importancia de apostar pola calidade como elemento diferenciador do turismo en Galicia, e especialmente por contar cun instrumento como Galicia Calidade, "cuxa traxectoria e imaxe asociada á calidade dos produtos galegos é un elemento que ofrece ao noso sector turístico un valor engadido na nosa busca da excelencia e a diferenciación", afirmou"
Requisitos de certificación
Tal e como explicou a directora xeral de Comercio, Sol Vázquez, para poder contar co selo de garantía os establecementos terán que contar con máis de dous anos de actividade, estar inscritos no Rexistro de Empresas e Actividades Turísticas e contar con licenza de actividade. Ademais deberán contar cun sistema de xestión da calidade: “Q” ou ISO 9001 + Compromiso de Calidade Turística SICTED.No encontro, no que tamén participou o xerente de Galicia Calidade, Alfonso Cabaleiro, sinalouse que no apartado dos produtos, os licenciatarios deberán dispor dunha oferta gastronómica con proporción significativa de pratos galegos con referencia e inclusión de materias primas galegas de orixe certificado: denominacións de orixe e indicacións xeográficas protexidas. Ademais haberá unha notable presenza de vinos das D.O. galegas así como augardentes e licores amparados polas IXP galegas correspondentes.
Por último, os establecementos que queiran contar co distintivo de calidade deberán contar ademais cunhas características específicas dadas pola situación, paisaxe, espazo natural, antigüidade ou singularidade da edificación, ou outras características que lle confiran un valor engadido e diferencial do turismo estándar.
Máis información -
23 Xuño, 2015A feira Corazón da Artesanía de Agolada amplía este ano a súa oferta con máis obradoiros de artesanía e postos de alimentación
Agolada (Pontevedra), 23 de xuño de 2015.- A directora xeral de Comercio, Sol Vázquez, o delegado da Xunta en Pontevedra, José Manuel Cores, e a xerente da Fundación Centro Galego da Artesanía e do Deseño, Elena Fabeiro, realizaron esta mañá unha visita de traballo xunto co alcalde de Agolada, Ramiro Varela, ao conxunto histórico-artístico dos Pendellos, onde se vai celebrar do 3 ao 5 de xullo o IV Encontro da Artesanía Tradicional e Popular de Galicia, Corazón da Artesanía, organizado pola Consellería de Economía e Industria.
No percorrido polos Pendellos adiantaron que nesta cuarta edición a feira contará con 8 novos pendellos que foron restaurados nos últimos meses, o que permite ampliar a feira tanto en número de obradoiros artesáns e en postos de produtos alimentarios como coa incorporación doutras actividades como charlas monográficas sobre oficios e talleres participativos para público infantil e adulto. En total participarán 35 artesáns de oficios como cestería, instrumentos musicais, ourivería e xoiería, olería e cerámica, téxtil, elaboración de zocos e figuras de pan, cantería, montaxe de moscas para a pesca, marroquinería, follalatería, talla en madeira, zapatería, cerería, elaboración de redes, colareiras e tornería de madeira.
O Corazón de Artesanía, no que un ano máis tradición e vangarda irán da man, incrementa considerablemente o número de empresas de alimentación que ofrecerán exposición e venda dos seus produtos, que chegan a 46 nesta cuarta edición. Entre as novidades atópanse produtos como xeados artesanais, cafés tostados en Galicia, carnes de razas autóctonas, queixos, conservas, embutidos e un proxecto de comercialización e divulgación da pesca artesanal responsable e sostible.
Como xa ocorrera o ano pasado, porase á disposición dos visitantes unha zona de acampada gratuíta, así como un servizo de autobuses de balde que unirán Agolada con Lalín e, como novidade desta cuarta edición, con Melide. Os autobuses sairán o sábado e o domingo da Praza da Marina de Lalín ás 12:00, ás 17:00 e ás 20:00, cara a Agolada (Avda. do Concello, 69), e volverán ás 16:45,19:30 e 00:30 horas. O venres os horarios serán ás 17:00 e as 20:00 de Lalín e ás 19:30 e ás 00:30 dende Agolada. Dende Melide, os autobuses sairán do cruce coa Estrada de Agolada ás 13:00 e ás 18:00 e volverán dende Agolada ás 18:45 e ás 23:45, agás o domingo que o último autobús será ás 21:30 horas. O venres o servizo sairá ás 18:00 de Melide e volverá ás 23:45 horas.
A organización da feira habitará unha carpa próxima aos Pendellos onde se ofrecerá un servizo de comida para os visitantes, que poderán facer as súas reservas chamando ao teléfono 608757564.
Artesanía no prato
Tal e como sinalou a directora xeral de Comercio, Sol Vázquez Abeal, un ano máis desenvolverase a iniciativa “Artesanía no prato”, coa que se pretende achegar a artesanía ás novas propostas da cociña galega. Os cociñeiros do grupo Nove Alberto G. Prelcic, do restaurante Silabario (Tui), Lucía Freitas, do establecemento A Tafona (Santiago de Compostela), Javier Rodríguez Ponte “Taky”, xefe de cociña de Catering Boketé (A Coruña), e Hector López, do restaurante España, de Lugo, serán os chefs encargados de menús degustación con produtos galegos de calidade, que se presentarán en pezas da marca Artesanía de Galicia. A partir destes showcookings, as pezas de artesanía incorpóranse aos menús como unha nova maridaxe, imprimíndolle un valor engadido á propia gastronomía.“Artesanía no prato” é o punto de partida dun proxecto máis amplo de colaboración entre artesanía, deseño e gastronomía, no que xa se está a traballar e que se enmarca no propio Plan de Artesanía de Galicia impulsado pola Xunta, que conta entre os seus obxectivos co impulso á innovación e á colaboración entre sectores para potenciar o talento e mellorar a competitividade.
Os menús degustación realizaranse con produtos galegos de calidade, moitos dos cales se poderán atopar á venda no propio Encontro, incluída a maridaxe, para a que se proporán algúns dos viños expostos e mesmo cervexas artesanais. Os cociñeiros empregarán para as presentacións dos seus menús pezas de cerámica dos obradoiros Cerámica Regal (Vivieiro), Cerámica Suve (Cangas), Cerámica Unzueta (Brión), Nacho Porto (Carnota) e Víctor Ares (A Coruña); pratos de madeira deseñados e producidos por Atalanta (A Estrada), táboas de madeira de oliveira elaboradas polo obradoiro Armaior (Quiroga) e téxtil de Concha Canoura (Culleredo).
O primeira showcooking terá lugar o venres ás 20:00 horas, a cargo de Lucía Freitas, de A Tafona. Casa de Xantar (Santiago de Compostela). O sábado será a quenda de Héctor López, do restaurante España (Lugo), e que ofrecerá pases ás 13:30 e ás 15:00 horas; así como de Alberto G. Prelcic, do restaurante Silabario (Tui), gañador dunha estrela Michelín, que ofrecerá unha demostración ás 20:30 horas. O cociñeiro Javier Rodríguez Ponte – TAKY, xefe de cociña de Catering Boketé (A Coruña), será o encargado das demostracións do domingo, que terán lugar en dous pases ás 13:30 e ás 15:00 horas. A inscrición para estas actividades é gratuíta, e é precisa inscrición previa no teléfono 981573017, en horario de 9:00 a 14:00 horas, ou no enderezo correo@adaptaconsultores.com. As prazas asignaranse por orde de recepción das reservas.
A cuarta edición do Corazón da Artesanía é un evento integral de divulgación e de posta en valor da artesanía e dos oficios artesáns, así como da súa interrelación con outras disciplinas artísticas. O amplo programa de actividades da feira inclúe tamén cursos de formación especializada para artesáns en materias como a fotografía aplicada á artesanía, a sombreirería con novos materiais ou o deseño de obxectos, inclúe talleres participativos de cerámica, cestería e centón, así como actividades específicas para achegar o público infantil á artesanía, que estarán centrados no traballo co papel, a elaboración de instrumentos musicais, a reciclaxe ou gastronomía, e que se desenvolverán ao longo dos tres días que dura a feira. Ademais, conta cunha variada programación musical que complementará o encontro e na que destacan as actuacións de Guadi Galego o venres e Odaiko e A Magnifique Bande dos Homes sen Medo o sábado, ao rematar a feira; así coma o espectáculo de Os lobos do espacio, o domingo na sesión vermú, a actuación da Banda Municipal de Agolada o sábado e a do grupo de música e baile tradicional Brincadeira, que pechará a feira na tarde do domingo.
Máis información -
22 Xuño, 2015Os máis pequenos poderán iniciarse nos oficios artesanais na feira "Corazón da Artesanía" en Agolada
Santiago, 22 de xuño de 2015.- O Corazón da Artesanía. IV Encontro de Artesanía Tradicional e Popular de Galicia que se celebrará no concello pontevedrés de Agolada entre os días 3 e 5 de xullo, impulsado pola Consellería de Economía e Industria, contará entre o seu amplo programa de actividades cunha programación específica destinada ao público infantil. Así, a través da Fundación Centro Galego da Artesanía e do Deseño organízanse talleres para iniciar os máis pequenos en diferentes oficios artesanais que estarán centrados no traballo co papel, a elaboración de instrumentos musicais, a reciclaxe ou gastronomía.
Por unha banda, a artesá Palmira Castro, do obradoiro Mimadriña (Fisterra), impartirá o taller “Elaboración de guirnalda decorativa”, a partir de barquiñas e peixes de origami, cosidas cunha máquina Singer centenaria. O taller realizarase durante os tres días da feira en horario de 11:30 a 14:00 e de 17:00 a 21:00 horas.
Ademais, o luthier Xaneco Tubío (Outeiro de Rei) encargarase da actividade “Elaboración de xoguetes sonoros”, que se realizará o venres, o sábado e o domingo de 11:30 a 14:00 e de 17:00 a 21:00 horas. Este obradoiro ten o obxectivo de ensinarlle ao público infantil do século XXI unha serie de xoguetes sonoros que os nenos galegos elaboraban ata mediados do século XX aproveitando os elementos que a natureza lles proporcionaba.
As tardes do venres, do sábado e do domingo, de 17:00 a 19:00 horas, a Praza do Concello estará dedicada ao taller “Substitúe o lixo por vida” impartido pola cooperativa O Canto da Balea (Carnota). A actividade consiste en clasificar o lixo presente nas nosas costas, mediante o xogo, e substituílo por unha especie mariña. O xogo complementarase co obradoiro Artelixo, no que os máis pequenos poderán transformar este lixo en obxectos decorativos.
O domingo de 17:30 a 19:30, os nenos e nenas de entre 6 e 12 que se acheguen ata o pendello O Paladar poderán participar na actividade “Artesanía no Prato”, na que aprenderán a elaborar pratos fríos e posteriormente presentalos con pezas de artesanía como soporte. Para esta actividade é necesaria a inscrición previa na páxina artesaniadegalicia.xunta.es.
A cuarta edición do Corazón da Artesanía, impulsada pola Consellería de Economía e Industria, que se celebrará no conxunto histórico-artístico dos Pendellos de Agolada, é un evento integral de divulgación e de posta en valor da artesanía e dos oficios artesáns, así como da súa interrelación con outras disciplinas artísticas. No amplo programa de actividades, centrado na exposición e venda de produtos artesanais e alimentarios de calidade, inclúense tamén actuacións musicais, formación especializada para artesáns e outras actividades nas que poderá participar o público asistente como showcookings, coloquios con artesáns expertos ou obradoiros de artesanía abertos ao público.
Estes talleres gratuítos de iniciación ao oficios artesanais estarán abertos á participación de público tanto adulto como infantil e desenvolveranse ao longo dos tres días da feira en horario de mañá e de tarde. Os ceramistas Susana González Amado e Antón Román impartirán “Iniciación ao torno cerámico”, no Pendello Cerámica, a cesteira Lola Tourón encargarase do taller “Iniciación á cestería”, no Pendello Cestería, e as artesás téxtiles Aurelia Costas e María del Mar Fernández traballarán cos visitantes no Pendello Centón na elaboración dunha peza conxunta no marco do taller “Iniciación ao centón”.
A organización destas actividades de divulgación e posta en valor da artesanía forma parte da estratexia da Consellería de Economía e Industria para promover o talento do sector artesanal galego e consolidar un sector competitivo e transversal, un dos grandes retos do Plan de Artesanía de Galicia.
Máis información -
17 Xuño, 2015O proxecto 'Enredando, artesanía na escola' remata o curso escolar esta semana na Mariña
Foz (Lugo), 16 de xuño de 2015.- O proxecto Enredando, artesanía na escola, impulsado pola Consellería de Economía e Industria a través da Fundación Centro Galego da Artesanía e do Deseño, pecha o curso escolar 2014/2015 en dous centros de ensino da Mariña de Lugo, en Ribadeo e Foz, co obxectivo de achegar aos máis novos os oficios artesanais, contribuíndo así á promoción e posta en valor do sector artesán galego.
Esta iniciativa, posta en marcha hai cinco anos e na que xa participaron máis de 15.000 alumnos de toda Galicia, céntrase nesta fase final do proxecto O Gremio da seda, na extracción da seda resultante dos vermes criados polos propios rapaces e rapazas que participaron na primeira fase da unidade didáctica.
A actividade, na que os alumnos xa traballaron o pasado curso, remata esta semana coas visitas aos centros educativos CEIP Gregorio Sanz de Ribadeo, realizada onte luns, e CEIP nº 1 de Foz, esta mesma mañá. Con estes centros súmanse un total de 14 colexios de infantil e primaria de toda Galicia que participaron durante este curso no proxecto Enredando, Artesanía na escola.
Os principais obxectivos deste proxecto, que conta coa colaboración da Consellería de Cultura, Educación e Ordenación Universitaria, son concienciar a sociedade do valor do produto feito á man así como presentarlle aos rapaces e rapazas que a artesanía pode ser tamén unha boa alternativa para o seu futuro laboral; impulsar o relevo xeracional nos oficios máis tradicionais promovendo o desenvolvemento da artesanía galega a través da formación de futuros artesáns creadores; e amosar á sociedade o valor engadido da artesanía en canto á súa creatividade, patrimonio cultural e tradición.
Contribúese así á posta en valor do sector artesán, unha das liñas de acción do Plan de Artesanía de Galicia, co obxectivo de conseguir un sector artesán sólido e sostible no tempo e que contribúa ao crecemento da economía galega, incidindo na competitividade empresarial e a potenciación do talento galego.
Máis información -
15 Xuño, 2015“As compras na túa vila teñen premio” dinamizará as vendas do comercio compostelán premiando a confianza dos seus clientes
Santiago, 15 de xuño de 2015.- A directora xeral de Comercio, Sol Vázquez Abeal, participou hoxe na presentación en Santiago da iniciativa de dinamización comercial As compras na túa vila teñen premio, unha campaña posta en marcha pola Federación Galega de Comercio e a Federación de Comercio da Coruña en colaboración coa Consellería de Economía e Industria que ten por obxectivo poñer en valor o comercio de proximidade e impulsar as vendas premiando a confianza dos clientes, sorteando entre os participantes tarxetas de compra por un total de 4.000 euros.
Nos días de duración da campaña, que se desenvolverá ata o 26 de xuño, deberán presentar os seus tíckets de compra na carpa situada na praza Roxa ou aos promotores que se atoparán polas rúas da cidade, que lles entregarán boletos de participación para o sorteo final que terá lugar o venres, 26 de xuño, dentro do programa dunha festa de peche que contará coa actuación do mago Rei Midas.
Neste acto, que se celebrará ese día ás 20 horas, sortearanse 5 tarxetas regalo de 300 euros e outras 25 por valor de 100 euros, e os posuidores dos boletos deberán estar presentes para converterse en gañadores.
O apoio ao desenvolvemento da campaña As compras na túa vila teñen premio enmárcase na estratexia da Xunta de impulso á competitividade do sector, na que o respaldo ao asociacionismo comercial é un eixo estratéxico.
Máis información -
15 Xuño, 2015Guadi Galego e Odaiko encabezan a programación musical da feira Corazón da Artesanía en Agolada
Santiago, 15 de xuño de 2015.- Os visitantes que se acheguen do 3 ao 5 de xullo ata o Corazón da Artesanía. IV Encontro de Artesanía Tradicional e Popular de Galicia, en Agolada (Pontevedra), poderán disfrutar dunha ampla programación musical pensada para todos os gustos que terán lugar na Praza do Concello. Os concertos principais de Guadi Galego o venres e do grupo de percusión Odaiko o sábado, que se celebrarán ao remate da feira, complementaranse con outras actividades musicais que se suman á grande variedade de eventos pensados para os visitantes.
A cuarta edición do Corazón da Artesanía, impulsada pola Consellería de Economía e Industria, que se celebra no conxunto histórico-artístico dos Pendellos de Agolada, é un evento integral de divulgación e de posta en valor da artesanía e dos oficios artesáns, así como da súa interrelación con outras disciplinas artísticas. No amplo programa de actividades inclúense, ademais das actuacións musicais, exposición e venda de produtos artesanais e alimentarios de calidade, formación especializada para artesáns, actividades para nenos e outras actividades nas que poderá participar o público asistente como showcookings, coloquios con artesáns expertos ou obradoiros de artesanía abertos ao público.
O novo traballo de Guadi Galego, Lúas de outubro e agosto, abrirá as actuacións musicais do IV Corazón da Artesanía, o venres ás 22:00 horas, na Praza do Concello. A cantante e compositora presenta o seu segundo disco en solitario, un conxunto de cancións nas que as emocións e os sentimentos son os protagonistas. Guadi Galego conta cunha intensa traxectoria musical que inclúe a súa participación en proxectos como Berrogüeto, Nordestinas, Espido ou aCadaCanto, e dous discos en solitario: Benzón (2009) e este Lúas de outubro e agosto, de finais de 2014.
O sábado as 13:00 será a quenda da Banda Municipal de Agolada e a partir das 21:00 comezarán as actuacións do grupo de percusión Odaiko e da Magnifique bande dos homes sen medo. A proposta artística de Odaiko céntrase na exploración da música tradicional multiétnica, na variante da percusión, unha faceta pouco habitual pola complexidade técnico-musical. Nos seus espectáculos pódense atopar instrumentos de orixe oriental, africana, latinoamericana, galega e instrumentos de creación posterior.
Pola súa parte, A magnifique bande dos homes sen medo, está composta por dez músicos cuxos instrumentos son a tuba, o fagot, o bombo, a caixa, o órgano, a guitarra eléctrica, a trompeta, o trombón, o saxo alto e o saxo tenor. Esta banda resultou gañadora dos I Premios Galegos da Música 2013, na categoría de grupos e orquestras de verbena.
O domingo a partir das 13:00 horas terá lugar a Sesión Vermut Lodeiros a cargo da empresa compostelá Bodegas Lodeiros, e durante a que ofrecerá o seu concerto Os lobos do espacio, unha banda que reproduce o estilo das murgas e das charangas populares en Galicia dende o século XIX pero cunha estética musical totalmente vangardista e totalmente permeable ás correntes culturais do século XXI.
O encargado de pechar as actuacións musicais do Corazón da Artesanía será o grupo de baile e música tradicionais Brincadeira, de Santiago de Compostela, co espectáculo Brincadeira de rúa. Nesta actuación, o grupo recrea unha pequena romaría popular na que se combina a actuación musical dos gaiteiros e das pandeireteiras con algunhas pequenas mostras de baile e, sobre todo, diversas actividades de animación para promover a participación activa do público, entre as que se incluirán bailes agarrados, xogos infantís, obradoiros de muiñeira e aturuxo ou cancións participativas.
A organización destas actividades de divulgación da artesanía e da súa colaboración con outras áreas de traballo forma parte da estratexia da Consellería de Economía e Industria para promover o talento do sector artesanal galego e consolidar un sector competitivo e transversal, un dos grandes retos do Plan de Artesanía de Galicia.
Máis información -
11 Xuño, 2015Representantes da Embaixada de EEUU visitan na Pobra a empresa Luís Escurís Batalla como mostra da calidade do sector conserveiro galego
Pobra do Caramiñal (A Coruña), 11 xuño do 2015.- A agregada de Agricultura da Embaixada dos Estados Unidos en España, Rachel Bickford, visitou esta tarde a empresa da Pobra do Caramiñal Luis Escurís Batalla, co obxectivo de coñecer de primeira man os seus métodos de produción como mostra da calidade e das potencialidades do sector conserveiro galego.
Esta visita enmárcanse dentro da viaxe a Galicia da representante de Estados Unidos impulsada pola Consellería de Economía e Industria, a través de Galicia Calidade, para abrir novas oportunidades de negocio para as empresas agroalimentarias galegas, dentro da cal se están a celebrar diferentes encontros e visitas a empresas punteiras do sector.
Luís Escurís Batalla, dedicada á produción de conservas de alta calidade, acadou no ano 2014 unha facturación de 5,5 millóns de euros e conta cun equipo de 78 empregados. Os seus produtos están amparados polo selo de garantía Galicia Calidade, que conta na actualidade con 52 empresas e máis de 250 produtos certificados, nos que o sector agroalimentario supón máis do 80%.
Máis información
© Xunta de Galicia. Información mantida e publicada na internet pola Xunta de Galicia
Pode subscribirse ás novidades desta web cun lector de feeds